సీఎంకు ఇచ్చిన వినతులు చెత్తకుప్పలో..

ముఖ్యమంత్రిని కలిసి కష్టాలు చెప్పుకుంటే తీరుతాయని భావించిన కర్ణాటక రైతులకు చేదు అనుభవం ఎదురైంది.

• సిద్ధరామయ్య తీరుపై విమర్శలు

బెంగళూరు, జూలై 13: ముఖ్యమంత్రిని కలిసి కష్టాలు చెప్పుకుంటే తీరుతాయని భావించిన కర్ణాటక రైతులకు చేదు అనుభవం ఎదురైంది. స్వయంగా సీఎంకు ఇచ్చిన వినతిపత్రాలు చెత్తకుప్పలో కనిపించాయి. ఈ ఘటన కర్ణాటక ముఖ్యమంత్రి సిద్ధరామయ్యపై విమర్శలకు కారణమైంది.

చామరాజనగరలో జూలై 10న సిద్ధరామయ్య ఓ బహిరంగ సభకు హాజరు కాగా, రైతులు, స్థానికులు తమ సమస్యలు పరిష్కరించాలని కోరుతూ ఆయనకు వినతిపత్రాలను సమర్పించారు. అయితే, ఈ వినతిపత్రాలు తాజాగా ఓ చెత్తకుప్పలో పడి ఉన్న వీడియోలు వైరల్‌ అయ్యాయి. దీంతో సిద్ధరామయ్య తీరుపై తీవ్ర విమర్శలు వ్యక్తమవుతున్నాయి. ఈ ఘటనపై సీఎం నైతిక బాధ్యత తీసుకొని, ప్రజలకు జవాబు చెప్పాలని బీజేపీ రాష్ట్ర అధ్యక్షుడు బీవై విజయేంద్ర డిమాండ్‌ చేశారు.