Shubhanshu Shukla | తొలిసారి ఐఎస్‌ఎస్‌కు భారత వ్యోమగామి.. ఏఎక్స్‌-4 మిషన్‌ పైలట్‌గా శుభాంశు శుక్లా

అమెరికన్‌ సంస్థ ‘యాక్సియమ్‌' త్వరలో మరోసారి రోదసి యాత్ర నిర్వహించనున్నది. అంతర్జాతీయ అంతరిక్ష కేంద్రానికి నిర్వహించే ఈ ప్రైవేట్‌ యాత్రకు భారత వాయుసేన అధికారి, ఇస్రో వ్యోమగామి శుభాంశు శుక్లా పైలట్‌గా ఎంపికైనట్టు ‘నాసా’ ప్రకటించింది.

Shubhanshu Shukla | న్యూఢిల్లీ: అమెరికన్‌ సంస్థ ‘యాక్సియమ్‌’ త్వరలో మరోసారి రోదసి యాత్ర నిర్వహించనున్నది. అంతర్జాతీయ అంతరిక్ష కేంద్రానికి నిర్వహించే ఈ ప్రైవేట్‌ యాత్రకు భారత వాయుసేన అధికారి, ఇస్రో వ్యోమగామి శుభాంశు శుక్లా పైలట్‌గా ఎంపికైనట్టు ‘నాసా’ ప్రకటించింది. ఫ్లోరిడాలో కెనడీ స్పేస్‌ సెంటర్‌ నుంచి వసంత కాలంలో (మే-జూన్‌) ఈ యాత్ర మొదలవుతుంది.

దీనిలో భాగంగా ‘స్పేస్‌ఎక్స్‌’ సంస్థకు చెందిన ‘డ్రాగన్‌’ వ్యోమనౌక ద్వారా శుభాంశు శుక్లా ఐఎస్‌ఎస్‌కు చేరుకోనున్నారు. దీంతో ప్రైవేట్‌ రోదసి యాత్ర ద్వారా ఐఎస్‌ఎస్‌కు వెళ్లిన తొలి భారత వ్యోమగామిగా ఆయన చరిత్రకెక్కనున్నారు. పైలట్‌గా ఈ యాత్రలో పాల్గొనేందుకు ఎంతో ఆసక్తితో ఎదురు చూస్తున్నానని శుక్లా గురువారం ఓ వెబినార్‌లో తెలిపారు.