Haryana law | ప్రైవేట్‌ ఉద్యోగాల్లో 75 శాతం రిజర్వేషన్‌ రాజ్యాంగ విరుద్ధం.. హర్యానా చట్టాన్ని రద్దు చేసిన హైకోర్టు

Haryana law Scrapped By Court | ప్రైవేట్‌ ఉద్యోగాల్లో స్థానికులకు 75 శాతం రిజర్వేషన్ కల్పిస్తూ హర్యానా ప్రభుత్వం చేసిన చట్టం రాజ్యాంగ విరుద్ధమని పంజాబ్‌, హర్యానా హైకోర్టు తెలిపింది. (Haryana's 75% Quota In Private Sector) ఈ వివాదస్పద చట్టాన్ని రద్దు చేసింది.

చండీగఢ్‌: ప్రైవేట్‌ ఉద్యోగాల్లో స్థానికులకు 75 శాతం రిజర్వేషన్ కల్పిస్తూ హర్యానా ప్రభుత్వం చేసిన చట్టం రాజ్యాంగ విరుద్ధమని పంజాబ్‌, హర్యానా హైకోర్టు తెలిపింది. (Haryana’s 75% Quota In Private Sector) ఈ వివాదస్పద చట్టాన్ని రద్దు చేసింది. శుక్రవారం ఈ మేరకు తీర్పు ఇచ్చింది. ప్రైవేట్ రంగ ఉద్యోగాల్లో రాష్ట్ర ప్రజలకు 75 శాతం రిజర్వేషన్‌ను తప్పనిసరి చేస్తూ హర్యానా ప్రభుత్వం ఒక చట్టాన్ని చేసింది. హర్యానా స్టేట్ ఎంప్లాయ్‌మెంట్ ఆఫ్ లోకల్‌ క్యాండిడేట్స్‌ యాక్ట్‌ 2020ను అసెంబ్లీలో ఆమోదించిన తర్వాత ఈ చట్టానికి అనేక మార్పులు చేశారు. నెలవారీ జీతం రూ. 30,000 కంటే తక్కువ ఉండే ప్రైవేట్ రంగంలో 75 శాతం ఉద్యోగాలు స్థానికులకు కేటాయించాలని ఇందులో పేర్కొన్నారు. అలాగే దీని కోసం నివాస ధృవీకరణను 15 ఏళ్ల నుంచి ఐదేళ్లకు తగ్గించారు.

కాగా, హర్యానా అసెంబ్లీ ఎన్నికలు సమీపిస్తున్న తరుణంలో జాట్‌ వర్గాన్ని ఆకట్టుకునేందుకు సీఎం మనోహర్ లాల్ ఖట్టర్ నేతృత్వంలోని సంకీర్ణ ప్రభుత్వం 2020లో తీసుకువచ్చిన ఈ చట్టాన్ని పంజాబ్‌, హర్యానా హైకోర్టు రద్దు చేసింది. ఈ నేపథ్యంలో ఈ తీర్పుపై సుప్రీంకోర్టులో అపీల్‌ చేయాలని హర్యానా ప్రభుత్వం భావిస్తున్నది.