న్యూఢిల్లీ, సెప్టెంబర్ 27: భార్యాభర్తల్లో ఒకరు తమ పిల్లల పట్ల భాగస్వామి ప్రేమను చూపకుండా అడ్డుకోవడం, తిరస్కరించడం అంటే అది మానసిక క్రూరత్వం కిందకే వస్తుందని ఢిల్లీ హైకోర్టు పేర్కొన్నది. 2018లో కింది కోర్టు మంజూరు చేసిన విడాకులను సమర్థిస్తున్నట్టు తీర్పు చెప్పింది. అంతేకాకుండా ఒక వ్యక్తి రోజూ మద్యం తాగినంత మాత్రాన అతడిది చెడు ప్రవర్తన అని ముద్ర వేయడం సబబు కాదని పేర్కొంది.
ఆఫీస్లోని స్నేహితులతో ఉండటం, వారితో పార్టీలు చేసుకోవడం కూడా క్రూరత్వంగా పరిగణించలేమని స్పష్టం చేసింది. తాను వచ్చినప్పుడల్లా తన భర్త తనను పట్టించుకోకుండా ఫోన్లోనే బిజీగా ఉంటున్నాడని పిటిషనర్ చేసిన ఆరోపణను ప్రస్తావిస్తూ ఒక వ్యక్తి వేరుగా ఇంకోచోట ఉన్నప్పుడు స్నేహితులు, సహచరులతో ఉండటం, ఫోన్లో వారితో సంభాషించడం సహజమైన ప్రక్రియగా పేర్కొంది.