Threaten To Kill Commander, Jawan Sacked | కమాండర్‌ను చంపుతానని సోషల్‌ మీడియాలో బెదిరింపు.. జవాన్‌ తొలగింపు

Threaten To Kill Commander, Jawan Sacked | తన బెటాలియన్‌ కమాండర్‌ను చంపుతానని పారామిలిటరీ జవాన్ సోషల్‌ మీడియా పోస్ట్‌లో బెదిరించాడు. దీంతో అధికారులు దీనిపై దర్యాప్తు చేశారు. చివరకు ఆ జవాన్‌ను సర్వీస్‌ నుంచి తొలగించారు.

శ్రీనగర్‌: తన బెటాలియన్‌ కమాండర్‌ను చంపుతానని పారామిలిటరీ జవాన్ సోషల్‌ మీడియా పోస్ట్‌లో బెదిరించాడు. దీంతో అధికారులు దీనిపై దర్యాప్తు చేశారు. చివరకు ఆ జవాన్‌ను సర్వీస్‌ నుంచి తొలగించారు. (Threaten To Kill Commander, Jawan Sacked ) అస్సాంకు చెందిన పినాక్ నాథ్‌, సెంట్రల్ రిజర్వ్ పోలీస్ ఫోర్స్ (సీఆర్పీఎఫ్‌)లో ప్రొబేషనరీ కానిస్టేబుల్‌గా చేరాడు. జమ్ముకశ్మీర్‌లోని దోడా జిల్లాలో ఉన్న సీఆర్పీఎఫ్‌ 33వ బెటాలియన్‌లోని ఆల్ఫా కంపెనీలో అతడు పోస్టింగ్ పొందాడు. అయితే జవాన్‌ పినాక్ నాథ్ ఇటీవల సోషల్‌ మీడియాలో ఒక పోస్ట్‌ పెట్టాడు. తన కంపెనీ బెటాలియన్‌ కమాండర్‌ను చంపి తాను చనిపోతానని అందులో బెదిరించాడు. ఇటీవల మరో దళానికి చెందిన ఒక జవాన్ తన సర్వీస్ వెపన్‌తో సీనియర్‌ను, సహచరులను కాల్చి చంపిన సంఘటనను అతడు ప్రస్తావించాడు.

కాగా, సీఆర్పీఎఫ్‌ కానిస్టేబుల్‌ పినాక్ నాథ్‌ సోషల్‌ మీడియా పోస్ట్‌ను ఆ బెటాలియన్ కమాండింగ్ ఆఫీసర్ తీవ్రంగా పరిగణించారు. దీనిపై విచారణ జరిపారు. ఆ తర్వాత సర్వీస్‌ నిబంధనల మేరకు సీఆర్పీఎఫ్‌ జవాన్‌ పినాక్‌ నాథ్‌ను శుక్రవారం విధుల నుంచి తొలగించారు. క్రమశిక్షణను ఉల్లంఘించడం, బెదిరింపులకు పాల్పడటం వంటివి సహించబోమని సీఆర్పీఎఫ్‌ అధికారులు పేర్కొన్నారు.

మరోవైపు సీఆర్పీఎఫ్‌ నుంచి తొలగించిన తర్వాత పినాక్ నాథ్‌ సోషల్‌ మీడియాలో ఒక వీడియోను పోస్ట్‌ చేశాడు. సస్పెండ్‌ లెటర్‌ను చేతిలో పట్టుకుని కనిపించాడు. తనను సర్వీస్ నుంచి తొలగించారంటూ అతడు ఏడ్చాడు.