ఎంజీయూలో దక్షిణ భారత చరిత్ర కాంగ్రెస్‌.. కొన‌సాగుతున్న విస్తృత చర్చలు

న‌ల్ల‌గొండ‌లోని మహాత్మాగాంధీ విశ్వవిద్యాలయంలో నిర్వహిస్తున్న 45వ దక్షిణ భారత చరిత్ర కాంగ్రెస్‌ రెండో రోజు చారిత్రక, సాంస్కృతిక, సామాజిక, రాజకీయ, ఆర్థిక అంశాలపై విస్తృత స్థాయిలో చర్చలు కొన‌సాగాయి. మూడు రోజులపాటు నిర్వహిస్తున్న ఈ సదస్సులో భాగంగా శనివారం ఏడు ప్రత్యేక ప్యానెళ్లలో పరిశోధకులు తమ పరిశోధన పత్రాలను సమర్పించి...

– రెండో రోజు 650 పరిశోధన పత్రాల సమర్పణ

రామగిరి, నవంబర్ 14 : న‌ల్ల‌గొండ‌లోని మహాత్మాగాంధీ విశ్వవిద్యాలయంలో నిర్వహిస్తున్న 45వ దక్షిణ భారత చరిత్ర కాంగ్రెస్‌ రెండో రోజు చారిత్రక, సాంస్కృతిక, సామాజిక, రాజకీయ, ఆర్థిక అంశాలపై విస్తృత స్థాయిలో చర్చలు కొన‌సాగాయి. మూడు రోజులపాటు నిర్వహిస్తున్న ఈ సదస్సులో భాగంగా శనివారం ఏడు ప్రత్యేక ప్యానెళ్లలో పరిశోధకులు తమ పరిశోధన పత్రాలను సమర్పించి, వివిధ చారిత్రక అంశాలపై తమ అధ్యయన ఫలితాలను వివరించారు. చరిత్ర రచనా పద్ధతులు, అణగారిన వర్గాల చరిత్ర, సామాజిక పరిణామాలు, దక్షిణ భారతదేశ రాజకీయ, ఆర్థిక పరిస్థితులు తదితర అంశాలపై పరిశోధకులు తమ అభిప్రాయాలను వెల్లడించారు. వివిధ ప్రాంతాల చరిత్రను సామాజిక కోణంలో విశ్లేషిస్తూ సాగిన చర్చలు సదస్సులో ప్రత్యేక ఆకర్షణగా నిలిచాయి.

ఎంజియూ హిస్టరీ అండ్ టూరిజం డిపార్ట్‌మెంట్ ప్రొఫెసర్, సదస్సు కో కన్వీనర్ విజయబాబు మాట్లాడుతూ.. సదస్సుకు మొత్తం 1,022 మంది నమోదు చేసుకోగా, వారిలో 830 మంది పరిశోధన పత్రాల సమర్పణకు పేర్లు నమోదు చేసుకున్నట్లు తెలిపారు. రెండో రోజు ముగిసే సమయానికి 650 పరిశోధన పత్రాల సమర్పణ పూర్తయిందని వెల్లడించారు. కేరళ, తమిళనాడు రాష్ట్రాల నుంచి అత్యధిక సంఖ్యలో పరిశోధకులు హాజరయ్యారని పేర్కొన్నారు. మహిళా పరిశోధకులు పెద్ద సంఖ్యలో పాల్గొనడం విశేషమని, వారు ఎంచుకున్న అంశాల్లో సామాజిక సున్నితత్వం, లోతైన పరిశీలన కనిపించాయని వివరించారు. సదస్సులో సమర్పించిన పరిశోధన పత్రాలను అనంతరం గ్రంథరూపంలో ప్రచురించనున్నట్లు స్థానిక కార్యదర్శి డాక్టర్‌ పనస రామకృష్ణ వెల్లడించారు.

జస్టిస్‌ పార్టీ పాత్రపై ప్రత్యేక ఉపన్యాసం

సదస్సులో భాగంగా నిర్వహించిన ప్రత్యేక ఉపన్యాసాలు చారిత్రక అంశాలపై విశ్లేషణాత్మక చర్చలకు వేదికయ్యాయి. ఆధునిక దక్షిణ భారతదేశ నిర్మాణంలో జస్టిస్‌ పార్టీ పోషించిన పాత్రపై ఆచార్య శ్రీనాథ్‌ ప్రసంగించారు. ఆచార్య బి.సి.రే పేరిట నిర్వహించిన ప్రత్యేక ఉపన్యాసాన్ని డాక్టర్‌ కె.రాజన్‌, ఆచార్య షేక్‌ మస్తాన్‌ పేరిట నిర్వహించిన ఉపన్యాసాన్ని ఆచార్య ఎర్రన్న పత్తర్‌ అందించారు. ఆచార్య ఆర్‌.సి.మిశ్రో, డాక్టర్‌ కవిత మిశ్రా పేరిట నిర్వహించిన ఉపన్యాసాన్ని హెచ్‌.మునవ అర్జన్‌ ఇచ్చారు.

విశ్వకర్మల స్థితిగతులు.. ఉన్నత విద్యలో ముస్లింల పాత్రపై చర్చ

ఈ ప్రత్యేక ఉపన్యాసాల్లో విశ్వకర్మల సామాజిక, ఆర్థిక స్థితిగతులు, ప్రాచీన, మధ్యయుగ చరిత్రలో వారి పాత్ర, తమిళనాడులో ఉన్నత విద్యారంగ అభివృద్ధిలో ముస్లింల భాగస్వామ్యం వంటి అంశాలను విశ్లేషించారు. ఆయా కాలాల్లో వివిధ సామాజిక వర్గాలు ఎదుర్కొన్న పరిస్థితులు, సమాజ నిర్మాణంలో వాటి పాత్రపై పరిశోధనాత్మక అభిప్రాయాలు వెల్లడయ్యాయి. ఈ కార్యక్రమంలో ఎంజియూ రిజిస్టర్ సదస్సు కన్వీనర్ ప్రొఫెసర్ కొప్పుల అంజిరెడ్డి, సదస్సు కమిటీ సభ్యులు వివిధ యూనివర్సిటీల ప్రొఫెసర్లు ఆచార్య విక్టర్‌బాబు, కార్యదర్శి ఆచార్య సదాశివన్‌, ఆచార్య మస్తాన్‌వలి పాల్గొన్నారు. ఎంజియూ హిస్టరీ అండ్ టూరిజం డిపార్ట్‌మెంట్ ప్రొఫెసర్ సదస్సు కో కన్వీనర్ ప్రొఫెసర్ విజయబాబు, ఆర్ట్స్ కళాశాల ప్రిన్సిపాల్‌, కోఆర్డినేటర్‌ డాక్టర్‌ అరుణప్రియ, సదస్సు లోకల్ కన్వీనర్ డాక్టర్‌ పనస రామకృష్ణ, డాక్టర్‌ షరీఫ్‌, డాక్టర్‌ శ్రీనివాస్‌, వివేక్‌ తదితరులు సదస్సు నిర్వహణ బాధ్యతలను పర్యవేక్షించారు.