న్యూఢిల్లీ : తల్లితో కలిసి చదువుతున్న ఓ బాలుడు పదేపదే ఏడుస్తున్న వీడియో సోషల్ మీడియాలో వైరల్గా మారింది. ఈ వీడియోపై చిరాకుపడిన నెటిజన్లు చిన్నారికి చదువు చెప్పే తీరు ఇదేనా అంటూ మహిళపై మండిపడ్డారు. ఈ వైరల్ వీడియోలో తల్లి చదువు చెబుతుండగా చిన్నారి భయపడుతూ హోంవర్క్ చేస్తుండటం కనిపించింది.
1-10 వరకూ కౌంట్ చేసే క్రమంలో తల్లి తనను ఎక్కడ కొడుతుందనే భయం బాలుడిలో కనిపించింది. మిని చందన్ ద్వివేది అనే యూజర్ ఇన్స్టాగ్రాంలో ఈ వీడియోను షేర్ చేయగా ఇప్పుడది వైరల్గా మారింది. ఈ వీడియోలో ఓ దశలో బాలుడు తల్లిని తనను కొడుతుందా లేదా అని అడుగుతుండటం వినిపించింది. ఆమె కోపం చల్లార్చేందుకు బాలుడు తల్లికి ముద్దివ్వడం కనిపించింది.
వీడియో చివరిలో బాలుడిని తల్లి ఎందుకు ఏడుస్తున్నావని అడుగుతూ కన్నీళ్లను తుడవడం కనిపిస్తుంది. ఈ ఘటనపై నెటిజన్లు అసంతృప్తితో రగులుతూ మీరంటే ఎందుకు మీ కొడుకు అంతలా భయపడుతున్నాడని ప్రశ్నించారు. అసలు చదువు చెప్పే తీరు ఇదేనా అంటూ మరికొందరు యూజర్లు మండిపడ్డారు. ఈ వీడియోను ఇప్పటివరకూ సోషల్ మీడియాలో ఏకంగా 60 లక్షల మందికిపైగా వీక్షించారు.