సాగుకు సగమే!

వ్యవసాయానికి నిరంతర విద్యుత్తు సరఫరా చేస్తున్నామని సీఎం, మంత్రులు చేస్తున్న ప్రకటనలన్నీ ఉత్తమాటలేనని క్షేత్రస్థాయి పరిస్థితులు రుజువుస్తున్నాయి. ఎక్కడా కూడా 24 గంటల కరెంటు సరఫరా జరుగుతున్న దాఖలాలు లేవు. అందులో సగం అంటే 12 గంటలు కూడా సక్రమంగా సరఫరా కావడం లేదని రైతులు గగ్గోలు పెడుతున్నారు.

• ఎవుసానికి 12-14 గంటలకు మించి రాని కరెంటు
• వచ్చే దానిలోనూ అప్రకటిత కోతలు
• సీఎం ప్రకటనలన్నీ ఉత్తమాటలే
• లోఓల్టేజీతో ట్రిప్‌ అవుతున్న మోటార్లు
• అదనపు ట్రాన్స్‌ఫార్మర్లకు తీవ్ర కొరత
• విద్యుత్తు సమస్యపై స్పందించని యంత్రాంగం
• విసిగి వేసారి రోడ్డెక్కుతున్న రైతులు
• 14-16గంటలే ఇస్తున్నట్లు మంత్రుల ఎదుటే అధికారుల వివరణ
• సీజన్‌ ప్రారంభంలోనే అన్నదాతలకు సమస్యల స్వాగతం

నల్లగొండ ప్రతినిధి, జూలై 23 (నమస్తే తెలంగాణ): వ్యవసాయానికి నిరంతర విద్యుత్తు సరఫరా చేస్తున్నామని సీఎం, మంత్రులు చేస్తున్న ప్రకటనలన్నీ ఉత్తమాటలేనని క్షేత్రస్థాయి పరిస్థితులు రుజువుస్తున్నాయి. ఎక్కడా కూడా 24 గంటల కరెంటు సరఫరా జరుగుతున్న దాఖలాలు లేవు. అందులో సగం అంటే 12 గంటలు కూడా సక్రమంగా సరఫరా కావడం లేదని రైతులు గగ్గోలు పెడుతున్నారు. వచ్చే కరెంటులోనూ మధ్య మధ్యలో కోతలు పెడుతుండటంతో వ్యవసా యం ముందుకు సాగడం లేదని రైతులు రోడ్లెక్కుతున్నారు.

బుధవారం పొద్దున్నే నల్లగొండ జిల్లాలోని ఇం డ్లూరు సబ్‌ స్టేషన్‌ ఎదుట రైతులు రోడ్లెక్కి ఆందోళనకు దిగగా గురువారం గుండాల మండలం సుద్దాలలో రైతులు సబ్‌స్టేషన్‌ను ముట్టడించి ఆగ్రహం వ్యక్తం చేశారు. ఇచ్చే కరెంటులోనూ లోఓల్టేజీకి తోడు అప్రకటిత కరెంటు కోతలు ఉండటంతో మోటార్లు సాగడం లేదని, నారు మళ్లకు నీరు పారడం లేదని రైతులు మం డిపడుతున్నారు. రానున్న రోజుల్లో సమస్య మరింత తీవ్ర రూపం దాల్చనున్నట్లు పరిస్థితులు స్పష్టం చేస్తున్నాయి. వ్యవసాయానికి నిత్యం 18-20 గంటల పాటు కరెంటు సరఫరా చేస్తున్నామని ప్రభుత్వం ప్రకటనలు గుప్పిస్తోంది.

కానీ సోమవారం నల్లగొండ కలెక్టరేట్‌లో సూపర్‌ ఎల్‌నినోపై జరిగిన సమీక్ష సమావేశంలో మంత్రులు, ఎమ్మెల్యేల ఎదుటే నల్లగొండ ఎస్‌ఈ మాట్లాడుతూ 14-16 గంటల పాటు కరెంటు సరఫరా చేస్తున్నట్లు ప్రకటించడం గమనార్హం. అంటే అధికారులే ఇలా చెప్తున్నారంటే ఇక క్షేత్రస్థాయిలో పరిస్థితి ఎలా ఉందో అర్థం చేసుకోవచ్చు. వీటికి తోడు జిల్లాలో లోఓల్టేజీ సమస్య పరిష్కారానికి కావాల్సిన అదనపు ట్రాన్స్‌ ఫార్మర్లు ఇతర మెటీరియల్‌ కూడా అందుబాటులో లేదు. ఇదే విషయమై ఉమ్మడి జిల్లా సమీక్షలో ఎమ్మెల్యేలు సైతం ప్రస్తావిస్తూ డిప్యూటీ సీఎం, విద్యుత్తు శాఖ మంత్రి భట్టి విక్రమార్క దృష్టికి ఎన్నిసార్లు తెచ్చినా ఫలితం లేదని వాపోయారు.

ఈ నేపథ్యంలో క్షేత్రస్థాయిలో వ్యవసాయానికి కరెంటు సరఫరాపై నమస్తే తెలంగాణ పరిశీలన చేపట్టింది. మండలాల వారీగా పరిస్థితి ఎంటన్నది రైతులు, ప్రజలతోపాటు అధికారుల వైపు నుంచి కూడా ఆరా తీసింది. ఈ పరిశీలనలో చాలా చోట్ల కనీసం 12 గంటలు కూడా కరెంటు వస్తున్న దాఖలాలు లేవు. కొన్నిచోట్ల 10 నుంచి 12 గంటలు మరికొన్ని చోట్ల 12-14గంటల కరెంటు మాత్రమే సరఫరా చేస్తున్నట్లు స్పష్టమైంది. దీనికి తోడు లోఓల్టేజీ సమస్య తీవ్రంగా ఉంది. దీంతో వస్తున్న కరెంటు కూడా పదేపదే ట్రిప్‌ అవుతున్నట్లు తెలిసింది. ఈ సారి వర్షాలు లేకపోవడంతో కాల్వలు రాకపోవడంతో రైతులు కూడా బోర్లు, బావులపైనే ఎక్కువగా అధారపడి సాగుకు సిద్ధపడ్డారు. దీంతో జిల్లావ్యాప్తంగా అధిక లోడ్‌ పడుతున్నట్లు తెలిసింది.

మండలాల వారీగా పరిస్థితి ఇలా…

• శాలిగౌరారం మండలంలో రోజుకు ఆరు గంటలకు మించి కరెంటు రావడం లేదని రైతు లు వాపోయారు. పగలు 3 గంటలు, రాత్రి 3 గంటలు కరెంటు ఇస్తున్నారు. దీంతో రైతులు ఒక్క మడి కూడా తడపలేకపోతున్నట్లు చెప్పారు.
• మిర్యాలగూడ మండలంలో ఉదయం 5 గంటల నుంచి సాయంత్రం 5 గంటల వరకే సాగు పనులు జరుగుతున్నాయి. అంటే 12 గంటల పాటు మాత్రమే కరెంటు వస్తోంది.
• గుడిపల్లి మండలంలో 4 రోజులుగా ఉద యం 4.45 గంటల నుంచి సాయంత్రం 4.45 గంటల వరకు త్రీఫేజ్‌ కరెంటు ఇస్తున్నారు. అంతకుముందు ఉదయం 2గంటల నుంచి సరఫరా చేస్తుండగా దాన్ని 4.45 గంటలకు మార్చడంతో 14 నుంచి 12 గంటలకు తగ్గించినైట్లెంది.
• కొండమల్లేపల్లిలో నాలుగైదు గంటలు మాత్రమే ఇస్తున్నారు. ఉదయం 8 గంటల నుంచి 10 గంటల వరకు మళ్లీ మధ్యాహ్నం 2 గంటల నుంచి సాయంత్రం ఐదు గంటల వరకు మాత్రమే కరెంటు ఇస్తున్నట్లు రైతులు చెప్తున్నారు.
• పీఏ పల్లి మండలంలో ఉదయం 4.40 గం టల నుంచి సాయంత్రం 4.40 గంటల వరకు ఇస్తున్నారు. ఇందులోనూ చెట్ల కటింగ్‌, ఎల్సీల పేరుతో రెండు గంటల అనధికార కోతలు విధిస్తున్నారు. 10 గంటలకు మించి రావడం లేదు.
• కేతేపల్లి మండలంలో అప్రకటిత కరెంటు కోతలు విధిస్తున్నారు. రాత్రి సమయంలో మూడు రోజులు నుంచి అసలు కరెంటు సరఫరా నే లేదు. లో ఓల్టేజీతో మోటార్లు సైతం కాలిపోతున్నట్లు రైతులు చెప్తున్నారు. నీళ్లున్నా మోటార్లు సాగక పొలాలు దున్నలేకపోతున్నట్లు చెప్పారు.
• నార్కట్‌పల్లి మండలంలో ఉదయం 6 గం టల నుంచి సాయంత్రం 5 గంటల వరకే వ్యవసాయ విద్యుత్తు సరఫరా అవుతోంది. 11 గంటలకు మించి కావడం లేదు. గాలి దుమారం, వర్షం వచ్చినా కరెంటు కోతలు విధిస్తున్నారు. ఇక లోఓల్టేజీ తీవ్రంగా ఉంది. పంటలు సాగు చేసే పరిస్థితి లేదని రైతుల వాపోతున్నారు.
• తిర్మలగిరిసాగర్‌ మండలంలో రాత్రి 2 గంటల నుంచి సాయంత్రం 4 గంటల వరకు కరెం టు సరఫరా అవుతోంది. అయితే మధ్యలో అప్రకటిత కరెంటు కోతలతో సరిగా పొలాలకు నీరందడం లేదు.
• నిడమనూరు మండలంలో ఉదయం 2.15 గంటల నుంచి సాయంత్రం 4.15గంటల వరకు త్రీఫేజ్‌ ఇస్తున్నారు. మధ్యలో కోతలు సహజం. మండలంలో 71 మెగావాట్ల డిమాండ్‌ ఉండగా 50 మెగావాట్లకు మించి సరఫరా కావడం లేదు.
• పెద్దవూరలో ఉదయం 2.30 గంటల నుం చి సాయంత్రం 4.30 గంటల వరకు, గుర్రంపోడులో ఉదయం 4గంటల నుంచి సాయంత్రం 4 గంటల వరకు సరఫరా అవుతోంది. అయితే ఇందులో కనీసం రెండు గంటలు అనధికారిక కోతలు విధిస్తున్నారు.
• మునుగోడు మండలంలో 12 గంటలకు మించి కరెంటు రావడం లేదు. అందులోనూ లోఓల్టేజీ సమస్య తీవ్రంగా ఉంది. మధ్యలో వివిధ కారణాలతో అప్రకటిత కరెంటు కోతలు విధిస్తున్నారు. కాలిపోతున్న ట్రాన్స్‌ఫార్మర్లు స్థానంలో కొత్త వాటిని వెంటనే ఇవ్వడం లేదు. కనీసం నాలుగైదు రోజులు పడుతున్నదని రైతులు ఆరోపిస్తున్నారు.
• దామరచర్ల మండలంలో సాయంత్రం 5 గంటల నుంచి రాత్రి 12 గంటల వరకు కేవలం 7 గంటలు మాత్రమే కరెంటు ఇస్తున్నారు. మం డల కేంద్రంలో మాత్రం ఉదయం 6 గంటల నుంచి సాయంత్రం 5గంటల వరకు ఇస్తున్నారు. నాట్లు పడ్డాక ఇట్లా కరెంటు వస్తే పొలాలు చేతికి రావని రైతుల ఆందోళన చెందుతున్నారు.
• కట్టంగూరు మండలంలో కట్టంగూరు, ఐటిపాముల, మునుకుంట్ల, ఈదులూరు, చెర్వు అన్నారం, పామనగుండ్లలో సబ్‌స్టేషన్లు ఉన్నా నిత్యం ఆరు గంటలకు మించి కరెంటు సరఫరా కావడం లేదు. బ్రేక్‌ డౌన్‌ పేరుతో గంటల తరబడి కోతలు విధిస్తున్నారు. లోఓల్టేజీతో మోటార్లు, స్టార్టర్లు కాలిపోతున్నాయి. కానీ ఇక్కడ లాగ్‌బుక్స్‌లో మాత్రం 17 నుంచి 18గంటల సరఫరా చేస్తున్నట్లుగా సిబ్బంది నమోదు చేస్తున్నట్లు తెలిసింది.
• త్రిపురారం మండలంలో ఉదయం 5 గం టల నుంచి సాయంత్రం 5 గంటల వరకు 12 గంటల కరెంటు సరఫరా అవుతోంది. అంతకు ముందు 14గంటల కరెంటు ఇచ్చేవారు. ఇందులోనే మధ్యలో ఎల్సీలు తోసుకోవడం, లైన్‌ ట్రిప్పు కావడంతో 10 గంటలకు మించడం లేదని రైతులు ఆరోపిస్తున్నారు.
• నల్లగొండ, కనగల్‌ మండలాల్లో ఉదయం 5 గంటల నుంచి సాయంత్రం 5 గంటల వరకు త్రీఫేజ్‌ కరెంటు సరఫరా చేస్తున్నారు. బ్రేక్‌ డౌన్‌, ఎల్సీ పేరుతో ఏడెనిమిది గంటలకు మించడం లేదని రైతులు పేర్కొన్నారు.
• వేములపల్లి మండలంలో ఉదయం 2.20 గంటల నుంచి సాయంత్రం 4.20 గంటల వరకు 14 గంటల సరఫరా జరుగుతోంది. మధ్యలో అంతరాయంతో రెండుమూడు గంటల పాటు కోతలు విధిస్తున్నారు.
• మాడ్గులపల్లి మండలంలో గతంలో ఉదయం 2 గంటల నుంచి సాయంత్రం 4గంటల వరకు ఇచ్చేవారు. కానీ దాన్ని ఉదయం 4 గంటల నుంచి సాయంత్రం 4 గంటలకు మార్చి 12గంటలే ఇస్తున్నారు.
• చండూరు మండలంలో ఉదయం 5 గంటల నుంచి సాయంత్రం 5 గంటల వరకు 12 గంటల కరెంటు సరఫరా చేస్తున్నారు. మధ్యలో ఎల్సీల పేరుతో బ్రేక్‌ డౌన్లు తదితర కారణాలతో అది 10 గంటలకు మించడం లేదని రైతులు చెప్తున్నారు.
• అడవిదేవులపల్లిలో ఉదయం 5 గంటల నుంచి సాయంత్రం 5 గంటల వరకే కరెంటు ఇస్తున్నారు. చిన్న గాలి దుమారం, వర్షం వచ్చినా మొత్తానికే కరెంటు తీసేస్తున్నారు. లాగ్‌బుక్స్‌లో మాత్రం అధికమొత్తంలో ఇస్తున్నట్లు రాస్తున్నారు.