రాష్ర్టాన్ని ఎడారి చేసే కుట్ర

కృష్ణా నీటిని అక్రమంగా ఆంధ్రాకు తరలిస్తున్నా ముఖ్యమంత్రి రేవంత్‌రెడ్డి, రాష్ట్ర ప్రభుత్వంలోని పెద్దలు కళ్లున్న కబోధిలా వ్యవహరిస్తున్నారని మాజీ ఎంపీ, బీఆర్‌ఎస్‌ సూర్యాపేట జిల్లా అధ్యక్షుడు బడుగుల లింగయ్యయాదవ్‌ విమర్శించారు.

• కళ్లున్న కబోధిలా కాంగ్రెస్‌ పాలన
• కృష్ణా నీటిని ఆంధ్రాకు అక్రమంగా తరలిస్తున్నా పట్టింపు లేని పాలకులు
• తెలంగాణను ఎడారిలా మార్చేందుకు కాంగ్రెస్‌ కంకణం
• మాజీ మంత్రి జగదీశ్‌రెడ్డి సారథ్యంలో సూర్యాపేట జిల్లా నుంచి జల పోరాటం
• మాజీ ఎంపీ బడుగుల లింగయ్యయాదవ్‌

సూర్యాపేట టౌన్‌, ఫిబ్రవరి 21 : కృష్ణా నీటిని అక్రమంగా ఆంధ్రాకు తరలిస్తున్నా ముఖ్యమంత్రి రేవంత్‌రెడ్డి, రాష్ట్ర ప్రభుత్వంలోని పెద్దలు కళ్లున్న కబోధిలా వ్యవహరిస్తున్నారని మాజీ ఎంపీ, బీఆర్‌ఎస్‌ సూర్యాపేట జిల్లా అధ్యక్షుడు బడుగుల లింగయ్యయాదవ్‌ విమర్శించారు. శుక్రవారం సూర్యాపేటలోని బీఆర్‌ఎస్‌ పార్టీ జిల్లా కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. నాగార్జునసాగర్‌కు వెయ్యి టీఎంసీల నీరు వస్తే అందులో 60 శాతం ఆంధ్రా, 40 శాతం తెలంగాణ వాడుకోవాల్సి ఉండగా, ఇప్పటి వరకు 10 వేల క్యూసెక్కుల నీటిని దొంగతనంగా ఆంధ్రాకు తరలించారని మండిపడ్డారు.

ఏపీ ప్రభుత్వం తమ వాటా నీటినే కాకుండా అదనంగా తరలించుకుపోతున్నా రాష్ట్ర నీటిపారుదల శాఖ మంత్రి ఉత్తమ్‌కుమార్‌రెడ్డి, ఉమ్మడి నల్లగొండ జిల్లాకు చెందిన మరో మంత్రి కోమటిరెడ్డి వెంకటరెడ్డి నోరు మెదపకపోవడం దౌర్భాగ్యమన్నారు. కృష్ణా జలాలను ఏపీకి అక్రమంగా తరలిస్తున్నారని, ఈ విషయంలో కృష్ణా నది యాజమాన్య బోర్డు(కేఆర్‌ఎంబీ)ని ప్రశ్నించి ఢిల్లీలో ధర్నా చేస్తామని బీఆర్‌ఎస్‌ నాయకుడు హరీశ్‌రావు హెచ్చరించిన తర్వాత కాంగ్రెస్‌ నాయకులు కృష్ణా జలాలపై మాట్లాడడం సిగ్గు చేటన్నారు. రాష్ట్రంలో బీజేపీకి 8 మంది ఎంపీలు ఉన్నారని, అందులో బండి సంజయ్‌, కిషన్‌రెడ్డి కేంద్ర మంత్రులుగా ఉన్నప్పటికీ ఈ విషయమై స్పందించకపోవడం అన్యాయమన్నారు. తెలంగాణ వాటా ప్రకారం కృష్ణా జలాలను పంపిణీ చేయాలని డిమాండ్‌ చేశారు.

బీఆర్‌ఎస్‌ హయాంలో రెండు పంటలకు నీళ్లు..

బీఆర్‌ఎస్‌ ప్రభుత్వంలో ఏడాదికి రెండు పంటలకు నీళ్లిచ్చామని బడుగుల గుర్తుచేశారు. ఉమ్మడి నల్లగొండ జిల్లాలో లిఫ్ట్‌ల ద్వారా లక్ష ఎకరాలకు, నాగార్జునసాగర్‌ ద్వారా 4.50 లక్షల ఎకరాలకు, ఎస్‌ఎల్‌బీసీ ద్వారా రెండున్నర లక్షల ఎకరాలకు నీళ్లిచ్చామని తెలిపారు. ఏపీ సీఎం చంద్రబాబు సన్నాయి నొక్కులకు, మాయమాటలకు రేవంత్‌రెడ్డి లొంగిపోయి తెలంగాణను ఎడారిలా మార్చేందుకు ప్రయత్నిస్తున్నారని ఆవేదన వ్యక్తం చేశారు.

భవిష్యత్తులో సూర్యాపేట, నల్లగొండ, హైదరాబాద్‌, మహబూబ్‌నగర్‌ జిల్లాల ప్రజలు తాగునీటికి కూడా ఇబ్బందులు పడే పరిస్థితి ఏర్పడుతుందన్నారు. శ్రీశైలం వద్ద ఆంధ్రా బలగాలు ఉంటే నాగార్జునసాగర్‌ దగ్గర కేంద్ర బలగాలను పెట్టడం ఏంటని ప్రశ్నించారు. మాజీ మంత్రి జగదీశ్‌రెడ్డి సారథ్యంలో సూర్యాపేట జిల్లా నుంచి జల పోరాటం మొదలవుతుందని పేర్కొన్నారు.

కృష్ణా జలాల అక్రమ తరలింపుపై ఢిల్లీకి వెళ్లి కేఆర్‌ఎంబీని ప్రశ్నించేందుకు తాము సిద్ధమని, మీరు వస్తే కలిసి పోరాడుదామని కాంగ్రెస్‌ నాయకులకు సూచించారు. కాగా, ఎస్సారెస్పీ రెండోదశ ద్వారా ఆరేండ్లు నీళ్లిచ్చామని, ప్రస్తుతం నీళ్లు ఇవ్వకపోవడంతో తుంగతుర్తి, సూర్యాపేట, మునగాల ప్రాంతాల్లో పంటలు ఎండుతున్నాయన్నారు. సమావేశంలో బీఆర్‌ఎస్‌ రాష్ట్ర కార్యదర్శి వై.వెంకటేశ్వర్లు, జిల్లా గ్రంథాలయ సంస్థ మాజీ చైర్మన్‌ నిమ్మల శ్రీనివాస్‌గౌడ్‌, మాజీ ఎంపీపీ నెమ్మాది భిక్షం, మాజీ జడ్పీటీసీ జీడి భిక్షం, ఆత్మకూర్‌.ఎస్‌ మండల బీఆర్‌ఎస్‌ అధ్యక్షుడు తూడి నర్సింహారావు పాల్గొన్నారు.