మహేష్‌ను కాపీ కొట్టేసిన శ‌ర్వానంద్‌

హీరో శర్వానంద్ పుట్టిన రోజు సందర్భంగా ఈయన నటిస్తున్న సినిమాలకు సంబంధించిన ఫస్ట్ లుక్స్ వరసగా విడుదల అవుతూనే ఉన్నాయి. ఈ మధ్య‌ వరస ఫ్లాపుల్లో ఉన్న శర్వా.. రాబోయే సినిమాలతో విజయం అందుకోవాలని కసితో ఉన్నాడు. ప్రస్తుతం ఈయన ‘మహా సముద్రం’, ‘ఆడాళ్లు మీకు జోహార్లు’ సినిమాలతో బిజీగా ఉన్నాడు. ‘శ్రీకారం’ సినిమా మార్చి 11న శివరాత్రి కానుకగా విడుదల కానుంది. ఇదిలా ఉంటే తెలుగు ఇండస్ట్రీలోనే కాదు.. ఎక్కడైనా కూడా ఒక సినిమాకు సంబంధించిన పోస్టర్ విడుదలైనపుడు దాని ముందు వెనక ఆరా తీయడానికి చాలా మంది వేచి చూస్తుంటారు. ఇప్పుడు శర్వా సినిమాల విషయంలో కూడా ఇదే జరుగుతుంది. 

తాజాగా ఈయన నటిస్తున్న ‘మహా సముద్రం’ సినిమాకు సంబంధించిన ఫస్ట్ లుక్ విడుదల చేశారు దర్శక నిర్మాతలు. మాస్ అప్పీల్ తో ఉన్న ఈ పోస్టర్ చూసి ఫిదా అవుతున్నారు శర్వానంద్ ఫ్యాన్స్‌. బహుశా ఈయన కెరీర్ లో ఇంత మాసీగా కనిపించడం ఇదే తొలిసారి అవ్వొచ్చు. అంతగా ఈ సినిమా కోసం మేకోవర్ అయిపోయాడు శర్వానంద్. ‘ఆర్ఎక్స్ 100’ ఫేమ్ అజయ్ భూపతి ఈ సినిమాను తెరకెక్కిస్తున్నాడు. ఇందులో సిద్ధార్థ్ కూడా మరో హీరోగా నటిస్తున్నాడు. ఇదిలా ఉంటే ఈ సినిమా పోస్టర్ చూసి ఇప్పుడు మహేష్ బాబు ఫ్యాన్స్ పండగ చేసుకుంటున్నారు. అదేంటబ్బా అనుకుంటున్నారా..? 

‘మహా సముద్రం’ పోస్టర్ చూస్తుంటే అచ్చంగా ఆరేళ్ళ కింద మహేష్ బాబు నటించిన ‘శ్రీమంతుడు’ సినిమా పోస్టర్ గుర్తుకొస్తుంది. కొరటాల శివ తెరకెక్కించిన ఈ చిత్రం రికార్డులు తిరగరాసింది. అందులో ఓ రాడ్ చేతిలో పట్టుకుని మాసీగా కనిపించాడు మహేష్. ఇప్పుడు మహా సముద్రంలో శర్వానంద్ స్టిల్ కూడా సేమ్ టూ సేమ్ అలాగే ఉంది. దాంతో ఈ పోస్టర్ చూడగానే వద్దన్నా మహేష్ బాబు గుర్తుకొస్తున్నాడు. అందుకే బర్త్ డే బాయ్ శర్వానంద్ తమ హీరో స్టైల్ ఫాలో అవుతున్నాడంటూ సూపర్ స్టార్ ఫ్యాన్స్ సోషల్ మీడియాలో చెప్పుకుంటున్నారు. ఈ సినిమా ఆగస్ట్ 19న విడుదల కానుంది.