ధాన్యం బస్తాలు తరలించాలని రైతుల నిరసన

మండలంలోని చిట్కుల్‌లో తూకం వేసిన ధాన్యం బస్తాలు తరలించాలని రైతు లు బుధవారం రాస్తారోకో, నిరసన వ్యక్తం చేశారు. గ్రామంలో తూకం వేసిన ధాన్యం బస్తాలు తరలించడంలో అధికారులు జాప్యం చేస్తున్నారని,

చిలిపిచెడ్‌, మే 15 : మండలంలోని చిట్కుల్‌లో తూకం వేసిన ధాన్యం బస్తాలు తరలించాలని రైతు లు బుధవారం రాస్తారోకో, నిరసన వ్యక్తం చేశారు. గ్రామంలో తూకం వేసిన ధాన్యం బస్తాలు తరలించడంలో అధికారులు జాప్యం చేస్తున్నారని, బస్తా కు మూడు కిలోల తరుగు తీయడాన్ని నిరసిస్తూ మెదక్‌-సంగారెడ్డి రహదారిపై రైతులు పెద్దఎత్తున రాస్తారోకోకు దిగారు. దీంతో ట్రాఫిక్‌ జామ్‌ అయ్యింది. సోమక్కపేట పీఏసీఎస్‌ సిబ్బంది అక్కడకు చేరుకొని సివిల్‌ సప్లయ్‌ డీఎంతో ఫోన్‌లో మాట్లాడి రైతులను సముదాయించారు. తూకం వేసిన ధాన్యాన్ని తరలించే వరకు రోడ్డుపై నుంచి జరిగేది లేదని రైతులు భీష్మించుకు కూర్చున్నారు. వద్దురా నాయన కాంగ్రెస్‌ పాలన..సీఎం రేవంత్‌ రెడ్డి డౌన్‌డౌన్‌ అంటూ రైతులు నినాదాలు చేశారు. డీఎం ఫోన్‌లో మాట్లాడి తూకం వేసిన ధాన్యం తరలించేందుకు చర్యలు తీసుకుంటామని రైతులకు హామీ ఇచ్చారు. రాస్తారోకోలో రైతులు పెద్దఎత్తున పాల్గొన్నారు.