సేక‌ర‌ణ ధాన్యం త‌డ‌వ‌కుండా చ‌ర్య‌లు చేప‌ట్టాలి : మ‌హ‌బూబ్‌న‌గ‌ర్ క‌లెక్ట‌ర్‌

మ‌హ‌బూబ్‌న‌గ‌ర్ : ఒక‌వేళ వర్షాలు కురిస్తే రైతులు సేకరణ కేంద్రాలకు తీసుకువచ్చే ధాన్యం తడిసిపోకుండా చ‌ర్య‌లు తీసుకోవాల‌ని మ‌హ‌బూబ్‌న‌గ‌ర్ జిల్లా కలెక్టర్ ఎస్ వెంకట్ రావు అధికారులను ఆదేశించారు. సేకరణ పూర్తయిన వెంటనే ధాన్యాన్ని మిల్లులకు త‌ర‌లించాల‌ని పేర్కొన్నారు. మార్కెట్ యార్డ్‌లోని ధాన్యం సేకరణ కేంద్రాన్ని కలెక్టర్ గురువారం పరిశీలించి రైతులతో మాట్లాడారు. హన్వాడ మండలంలోని కోత్త‌పేటకు చెందిన రైతు చందర్‌ను ధాన్యాన్ని ఎప్పుడు సేకరణ కేంద్రానికి తీసుకువచ్చావని అడిగారు. 80 బస్తాల ధాన్యాన్ని తీసుకువ‌చ్చిన‌ట్లు ట్రక్కుల కొరత కారణంగా రవాణా ఆలస్యం అయిందని చందర్ తెలిపాడు. అనంత‌రం టార్పాలిన్ల‌ను ఏర్పాటు చేయాల్సిందిగా క‌లెక్ట‌ర్ ఆదేశించారు. సేక‌రించిన ధాన్యాన్ని నిల్వ చేసేందుకు గోదాముల‌ను, ర‌వాణా చేసేందుకు ట్ర‌క్కుల‌ను చూడాల్సిందిగా సూచించారు.