Visit:
మహబూబ్‌నగర్‌, నవంబర్‌ 29 (నమస్తే తెలంగాణ ప్రతినిధి) : మహబూబ్‌నగర్‌ జిల్లా కేంద్రంలోని బాలుర జూనియర్‌ కళాశాల మైదానంలో ‘నమస్తే తెలంగాణ, తెలంగాణ టుడే’ సంయుక్త ఆధ్వర్యంలో రెండు రోజుల పాటు నిర్వహిస్తున్న ఆటో ఎక్స్‌పో కార్యక్రమం శనివారం ప్రారంభం కాగా, ప్రజల నుంచి విశేష స్పందన లభించింది. ఉదయం 10:30గంటలకు ప్రారంభమై సాయంత్రం వరకు కొనసాగింది. మాజీ మంత్రులు శ్రీనివాస్‌ గౌడ్‌, లక్ష్మారెడ్డి, నమస్తే తెలంగాణ ఏడీవీటీ జీఎం సురేందర్‌రావు, శ్రీరామ జయరామ ఎండీ బెక్కరి రాంరెడ్డి, యూనియన్‌ బ్యాంక్‌ రీజనల్‌ మేనేజర్లు మురళీకృష్ణ, శ్రీనివాసమూర్తి, ఎస్‌బీఐ రీజనల్‌ మేనేజర్‌ రామ్మూర్తి ఈ కార్యక్రమాన్ని ప్రారంభించారు.
మాజీ మంత్రులు జ్యోతి ప్రజ్వలన చేసి స్టాళ్లను తిలకించారు. పాలమూరు పట్టణంలో ఇలాంటి షోను నిర్వహించడం అభినందనీయమని నిర్వాహకులను అభినందించారు. స్కోడా, కియా, మారుతి సుజుకీ, నెక్సా, హ్యుండాయ్‌తోపాటు వివిధ బ్రాండ్ల కార్లు, బైక్‌లు, ట్రాక్టర్లు, ఎలక్ట్రికల్‌ వాహనాలు, సోలార్‌ ప్యానళ్లు ప్రదర్శన వద్ద ఏర్పా టు చేశారు. వినియోగదారులకు నచ్చిన వాహనాలను తక్కువ వడ్డీతో అందించేందుకు ఎస్‌బీఐ, యూనియన్‌ బ్యాంక్‌, బ్యాంక్‌ ఆఫ్‌ బరోడా బ్యాంక్‌లు తక్కువ వడ్డీ రేట్లతో వాహనాల కోసం స్టాళ్లను ఏర్పాటు చేశాయి.
రెండు రోజులపాటు నిర్వహిస్తున్న ఆటో షోకు వేదికైన బాలుర జూనియర్‌ కళాశాల మైదానం కిక్కిరిసిపోయింది. వినియోగదారునికి కావాల్సిన అన్ని రకాల వాహనాలు ఒకే వేదికపై ఉండడంతో చూసేందుకు భారీ ఎత్తున తరలివచ్చారు. కొత్త కార్లు, బైక్‌ల వద్ద సెల్ఫీలు తీసుకున్నారు. కేంద్ర ప్రభుత్వం కార్లు, ద్విచక్ర వాహనాలపై జీఎస్టీని తగ్గించడంతో వివిధ కంపెనీలు వినియోగదారులను ఆకట్టుకునేందుకు భారీ ఆఫర్లు ప్రకటించాయి. మరోవైపు సంవత్సరం ము గుస్తుండడంతో సేల్స్‌ పెంచుకోవడానికి ఆకర్షణీయమైన డిస్కౌంట్లను ఇస్తున్నాయి. వాహనాల కొనుగోళ్లపై బ్యాంకర్లు ప్రైవేట్‌ ఫైనాన్స్‌ల వడ్డీ రేట్లు కూడా అప్పటికప్పుడే కనుక్కోవడం కనిపించింది. ఈ ఆటో షో ఆదివారం కూడా నిర్వహిస్తుండడంతో పెద్ద ఎత్తున జనం తరలివచ్చే అవకాశం ఉందని నిర్వాహకులు తెలిపారు.
ఆటోషోలో మాజీమంత్రి శ్రీనివాస్‌ గౌడ్‌ రాయల్‌ ఎన్‌ఫీల్డ్‌ బైక్‌ నడిపి అక్కడున్న వారిని ఉత్సాహపరిచారు. బుల్లెట్‌ బండి కొత్త మోడల్‌ డ్రైవ్‌ చేయడంతో అక్కడున్న సందర్శకులు ఉత్సాహంతో చప్పట్లు కొట్టారు. కొందరు మంత్రి బైక్‌ నడుపుతుండగా ఫొటోలు తీసి సోషల్‌ మీడియాలో పోస్ట్‌ చేశారు. సందర్శకులకు బహుమతులు ఆటో షోను తిలకించేందుకు వచ్చిన సందర్శకులకు నిర్వాహకులు బంపర్‌ ఆఫర్లు ఇచ్చారు. స్టాళ్లను పరిశీలించిన వారికి లక్కీ డ్రా నిర్వహించారు. స్టాళ్లను సందర్శించిన అనంతరం వారి వివరాలను లక్కీడ్రా కూపన్‌లో రాసి గిఫ్ట్‌ బాక్స్‌లో వేయగా, వాటిలో నుంచి లక్కీ డ్రా తీశారు. మహబూబ్‌నగర్‌ పట్టణానికి చెందిన ప్రదీప్‌, జైనల్లీపూర్‌కు చెందిన చంద్రశేఖర్‌ లక్కీడ్రాలో విజేతలుగా నిలిచారు. వీరికి నిర్వాహకులు బహుమతులు అందజేశారు.
తెలంగాణ ప్రజల చిరకాల ఆకాంక్షను నెరవేర్చడమే కాకుండా పదేండ్ల పాలనలో ప్రజల ఆర్థిక కొనుగోలు శక్తిని పెంచిన ఘనత కేసీఆర్‌కు దక్కిందని మాజీ మంత్రులు శ్రీనివాస్‌గౌడ్‌, లక్ష్మారెడ్డి అన్నారు. శనివారం మహబూబ్‌ నగర్‌ జిల్లా కేంద్రంలోని బాలుర జూనియర్‌ కళాశాల మైదానంలో ‘నమస్తే తెలంగాణ- తెలంగాణ టుడే’ సంయుక్త ఆధ్వర్యంలో ఏర్పాటు చేసిన ఆటో షోను నమస్తే తెలంగాణ ఏడీవీటీ జీఎం సురేందర్‌రావు, యూనియన్‌ బ్యాంక్‌ ఆర్‌ఎం మురళీకృష్ణ, శ్రీనివాస్‌మూర్తి, శ్రీరామ జయరామ ఎండీ బెక్కరి రాంరెడ్డితో కలిసి రిబ్బన్‌ కట్‌ చేసి ప్రారంభించారు.
అనంతరం మాట్లాడుతూ ప్రస్తుత సమాజంలో ప్రజలు సెల్‌ఫోన్లు, టీవీల తర్వాత బైక్‌, కార్ల కొనుగోలుకు అధికంగా ఆసక్తి కనబరుస్తున్నారని తెలిపారు. మహా నగరాల్లో నిర్వహించే ఇలాంటి షోలు పాలమూరులో నిర్వహించడం గర్వకారణమన్నారు. అన్ని వా హనాలను ఒకే వేదికపైకి తీసుకొచ్చిన ‘నమస్తే తెలంగాణ-తెలంగాణ టుడే’ నిర్వాహకులకు అభినందనలు తెలిపారు. గతంలో సైకిల్‌, ద్విచక్ర వాహనాలు అక్కడక్కడా కనిపిస్తేనే గొప్పగా చూసేవారని, నేడు పల్లెల్లోనూ పదుల సంఖ్యలో కార్లు కనిపిస్తున్నాయని తెలిపారు. నచ్చిన కార్లు, బైక్‌లకు రుణ సదుపాయం అందించేందుకు సైతం బ్యాంకర్లు ముందుకురావడం శుభపరిణామం అన్నారు.
నమస్తే తెలంగాణ ఏడీవీటీ జీఎం సురేందర్‌రావు మాట్లాడుతూ కస్టమర్లకు తమ అభిరుచికి అనుగుణంగా కావాల్సిన వాహనాలను కొనుగోలు చేసేందుకు ఆటో షో ఏర్పాటు చేసినట్లు తెలిపారు. శ్రీరామ జయరామ ఎండీ బెక్కరి రాంరెడ్డి మాట్లాడుతూ 1984లో ట్రాక్టర్ల షోరూం ఏర్పాటు చేశానని, అప్పట్లో నెలకు ఒక ట్రాక్టర్‌ అమ్మితే చాలనుకున్నామని, ప్రస్తుతం దేశంలోనే నెంబర్‌వన్‌గా నిలిచామన్నారు. మారుతీ కంపెనీతో ప్రస్థానం ప్రారంభించి ఇప్పటి వరకు సుమారు 5లక్షల కార్లను అమ్మి ప్రపంచంలోనే నెంబర్‌వన్‌ కస్టమర్ల మనసును చూరగొన్నామని తెలిపారు. ప్రజల్లో మార్పు వస్తుందని, అందుకు అనుగుణంగా సేల్స్‌ కూడా పెరుగుతున్నాయన్నారు.
ఆటో షోలో మాజీ మంత్రులు రెండు కొత్త మాడల్‌ కార్లను ఆవిష్కరించారు. మారుతి అరేనా వారి విక్టోరిస్‌ మోడల్‌ హైబ్రీడ్‌ కారు సరికొత్త ఫీచర్లతో అందు బాటులోకి వచ్చింది. పెట్రోల్‌ ఎలక్ట్రికల్‌ వర్షన్‌ టూ నడిచే ఈ కారును మారుతి ఇటీవల మార్కెట్లోకి ప్రవేశపెట్టింది. ఈ కారును ఆవిష్కరించి మాజీ మంత్రు లు శ్రీనివాస్‌గౌడ్‌, లక్ష్మారెడ్డి, శ్రీరామ జయరామ ఎండీ బెక్కరి రాంరెడ్డి టెస్ట్‌ డ్రైవ్‌ నిర్వహించారు. అనంతరం హుండాయ్‌లో కొత్త వెన్యూ వర్షన్‌ కారును ఆవిష్కరించారు. కార్యక్రమంలో నమస్తే తెలంగాణ బీఎం మహేందర్‌, బ్యూరో ఇన్‌చార్జి వెంకటేశ్వరరావు, ఎడిషన్‌ ఇన్‌చార్జి నరేశ్‌ కుమార్‌, డిప్యూటీ మేనేజర్‌ విజయకుమార్‌, సర్క్యులేషన్‌ ఇన్‌చార్జి ఆనంద్‌, డీఎస్పీ వెంకటేశ్వర్లు, సిబ్బంది నరసింహారెడ్డి, శ్రీనివాస్‌రెడ్డి, రమేశ్‌, నవీన్‌, రఘునాథ్‌, మహేశ్వర్‌రెడ్డి, సతీశ్‌, ప్రతాప్‌రెడ్డి, శ్రీనివాసులుతోపాటు పలువురు పాల్గొన్నారు.
