ప్రేమోన్మాదం

ప్రేమకు ఉన్మాదానికి మధ్య హద్దు చెరిపేసి మనసులేని మనుషులు కత్తితో ప్రేమ

ప్రేమకు ఉన్మాదానికి మధ్య హద్దు చెరిపేసి
మనసులేని మనుషులు కత్తితో ప్రేమ
సామ్రాజ్యాన్ని జయించొచ్చని కలలు
కంటున్నారు..
ఏ మారణాయుధం ప్రేమను సాధించి
జయకేతనం ఎగరేసింది?
అభాగినుల రక్తంతో నడిరోడ్డూ కేన్వాసుపై
వికృత వాంఛల్ని గీయటం తప్ప!
ప్రేమంటే అందమైన మాంసపు ముద్దను
సొంతం చేసుకొనే పౌరుషం కాదే
ఆ ముద్ద వెనుక ముగ్ధరాలి మనసెరిగి
నడుచుకునే త్యాగశీలత కదా!
మగతనమంటే వెంటపడి వేధించే పీడకల కాదే!
అందానికి మనసుంటుందని గుర్తించే
సామాజిక సంస్కారం కదా!
రేపొక ఇంటిని వెలిగించే దీపాన్ని
కత్తికొక ప్రేమగా ఆర్పేస్తుంటే
ప్రతి అందం వెనుక తార్లాడే మృత్యునీడల్ని
ఎప్పటికీ తప్పించలేమా!
పట్టపగలు నడిరోడ్డులో నలుగురిలో
ఆడది..
రక్షించలేకపోతున్నాం!
మహాత్ముడు చెప్పిన అర్ధరాత్రి ఆడది
ఒంటరిది.. క్షేమంగా ఇల్లు చేరేదెప్పుడు?
(ప్రేమ పేరుతో స్త్రీలపై జరుగుతున్న హత్యాకాండకు నిరసనగా)

భీమవరపు పురుషోత్తమ్‌
99498 00253