చలికాలంలో ఆరోగ్యాన్ని కాపాడుకునేందుకు అనేక జాగ్రత్తలు తీసుకుంటాం మనం. మరి మొక్కలు? చలి నుంచి తప్పించుకోలేక.. ఆరుబయట పొడిగాలులు, మంచును తట్టుకోలేక నిర్జీవంగా, నిస్తేజంగా మారిపోతాయి. శీతకాలపు గండాన్ని దాటలేకపోతాయి. చిన్నపాటి ఉపాయాలతో ఈ సమస్యను సులభంగా అధిగమించవచ్చు.
మల్చింగ్: చలిని తట్టుకునేందుకు, మోతాదుకు మించిన నీటి కారణంగా కుళ్లిపోకుండా ఉండేందుకు, పోషకాలు సమృద్ధిగా అందేందుకు.. మొక్క చుట్టూ ఉన్న ఉపరితలాన్ని కప్పి ఉంచాలి. ఈ ప్రక్రియనే ‘మల్చింగ్’ అంటారు. ఇందుకోసం ఎండుగడ్డి, కొబ్బరిపీచు, ఎండు ఆకులు
ఉపయోగిస్తారు.
నీరు:ఒక్కో మొక్కకు ఒక్కోలా నీటి అవసరం ఉంటుంది. వాతావరణం చల్లగా ఉన్నా సరే.. పొడిగాలులు, తక్కువ తేమ కారణంగా ఎప్పటికప్పుడు నీరు అందిస్తూ ఉండాల్సిందే.
సూర్యరశ్మి: వరండాలోని మొక్కలను సూర్యరశ్మి తగిలే చోటుకు మార్చాలి. పెరట్లో మొక్కలు మరీ గుబురుగా పెరిగిపోయి వేర్లు కుళ్లిపోకుండా… దట్టంగా ఉన్న ఆకులను జాగ్రత్తగా తొలగించాలి.
రాత్రివేళల్లో: తెలంగాణలో చాలా చోట్ల చలికాలపు రాత్రులు గడ్డ కట్టించేస్తుంటాయి. పడిపోయిన ఉష్ణోగ్రతల నుంచి మొక్కల్ని కాపాడేందుకు రాత్రివేళ వాటి మీద గోనెసంచులు, ప్లాస్టిక్ కవర్స్, పాత దుప్పట్లు లాంటివి కప్పి ఉంచితే మంచిది.
..చలికాలం కొన్ని మొక్కలకు కష్టకాలమే కావచ్చు. అయినా, నిరాశ పడిపోకుండా వాటిని జాగ్రత్తగా సంరక్షించుకోవాలి. మరికొన్నేమో చలికాలంలోనే అందమైన పూలు ఇస్తాయి. క్యారెట్, క్యాలీఫ్లవర్, పాలకూర లాంటి కాయగూరలు చలికాలంలో మరింత రుచిగా ఉంటాయని చెబుతారు ఉద్యానవన నిపుణులు.