నా వయసు పాతికేండ్లు. ఇటీవల నెలసరికి ముందు చాలా ముభావంగా ఉంటున్నా. ఏ పనీ సరిగ్గా చేయలేకపోతున్నా. కుంగుబాటు, నిరాశ అధికం అవుతున్నాయి. విపరీతమైన చికాకు. ప్రీ మెన్స్ట్రువల్ సిండ్రోమ్ (పీఎంఎస్) ఇంత ఇబ్బందికరంగా ఉంటుందా? ఆ తీవ్రత తగ్గించుకునే మార్గం ఉందా?
– ఓ పాఠకురాలు
మీరు చెప్పిన లక్షణాల ఆధారంగా దీన్ని ‘ప్రీ మెన్స్ట్రువల్ డిస్పారిక్ డిజార్డర్’గా చెప్పవచ్చు. ఇది ప్రీ మెన్స్ట్రువల్ సిండ్రోమ్ కంటే భిన్నమైంది. అండం విడుదల తర్వాత శరీరంలో స్రవించే ప్రొజెస్టిరాన్ హార్మోన్ కూడా కొన్నిసార్లు డిప్రెషన్కు కారణం అవుతుంది. దానివల్ల మనసు మనసులో ఉండదు. అలసట, చికాకు, నిరాశ కలుగుతాయి. గైనకాలజిస్టును కలిస్తే దీనికి కొన్ని మందులు సూచిస్తారు. అవసరమైతే సైకాలజిస్టునూ సంప్రదించమని సూచిస్తారు. మానసిక నిపుణులు కాగ్నిటివ్ బిహేవియర్ థెరపీ ఇస్తారు. తొలి దశలో మందులు వాడకుండానే మనసును ఎలా నియంత్రించుకోవచ్చు అనే విషయంలో తగిన సూచనలు చేస్తారు. అలా కుదరని పక్షంలో ఔషధాలు సిఫారసు చేస్తారు. కాబట్టి, నెలసరికి ముందు తీవ్రమైన చికాకు ఇబ్బంది పెట్టినప్పుడు తప్పక డాక్టర్ను సంప్రదించాలి.
డాక్టర్ పి. బాలాంబ
సీనియర్ గైనకాలజిస్ట్