వేతనాలు ఇవ్వండి మహాప్రభో..!

ఖమ్మంజిల్లా తిరుమలాయపాలెం మండలంలోని దమ్మాయిగూడెంలో మంగళవారం మిషన్‌ భగీరథ కార్యాలయం వద్ద కార్మికులు వేతనాల కోసం ఆందోళనకు దిగారు. ఏజెన్సీ కంపెనీ ఎల్‌అండ్‌టీ వారు గత నాలుగు నెలలుగా వేతనాలు ఇవ్వకుండా ఇబ్బందులకు గురిచేస్తున్నట్లు వారు ఆవేదన వ్యక్తం చేశారు.

• దమ్మాయిగూడెంలో మిషన్‌ భగీరథ కార్మికుల ఆందోళన
• ఎల్‌అండ్‌టీ మేనేజర్‌, అధికారుల నిర్బంధం
• పోలీసుల జోక్యంతో విడుదల
• విధుల బహిష్కరణతో గ్రామాల్లో నిలిచిపోయిన తాగునీటి సరఫరా

తిరుమలాయపాలెం, జూలై 16 : ఖమ్మంజిల్లా తిరుమలాయపాలెం మండలంలోని దమ్మాయిగూడెంలో మంగళవారం మిషన్‌ భగీరథ కార్యాలయం వద్ద కార్మికులు వేతనాల కోసం ఆందోళనకు దిగారు. ఏజెన్సీ కంపెనీ ఎల్‌అండ్‌టీ వారు గత నాలుగు నెలలుగా వేతనాలు ఇవ్వకుండా ఇబ్బందులకు గురిచేస్తున్నట్లు వారు ఆవేదన వ్యక్తం చేశారు. మిషన్‌ భగీరథ కార్యాలయానికి వచ్చిన ఎల్‌అండ్‌టీ కంపెనీ జిల్లా మేనేజర్‌ ఎల్‌కే రెడ్డి, ఇద్దరు అధికారులను కార్యాలయంలో నిర్బంధించి ధర్నా చేశారు. కార్మికులకు ప్రభుత్వం నెలకు రూ.19,000 జీతం ఇస్తుంటే ఎల్‌అండ్‌టీ కంపెనీ, అధికారులు కుమ్మకై రూ.13,000 మాత్రమే ఇస్తున్నారని వాపోయారు. జీతాల చెల్లింపుపై స్పష్టమైన హామీ ఇవ్వాలని మేనేజర్‌ను నిలదీశారు. ప్రభుత్వం నుంచి కంపెనీకి బిల్లులు వచ్చేవరకు స్పష్టత ఇవ్వలేమని మేనేజర్‌ వారికి తెలిపారు. దీంతో వేతనాలు ఇచ్చేవరకు విధులను బహిష్కరిస్తున్నట్లు కార్మికులు ప్రకటించారు. విషయం తెలుసుకున్న తిరుమలాయపాలెం ఎస్‌ఐ గిరిధర్‌రెడ్డి సిబ్బందితో అక్కడకు చేరుకొని కార్మికులతో మాట్లాడడంతో మేనేజర్‌, అధికారులను వదిలేశారు. మిషన్‌ భగీరథ కార్మికులు విధులను బహిష్కరించడంతో మండలంలో తాగునీటి సరఫరా నిలిచిపోయింది.