‘పామాయిల్‌ నర్సరీ’లకు కొత్త మార్గదర్శకాలు

పామాయిల్‌ నర్సరీ నిర్వహణకు ఇండియన్‌ ఇనిస్ట్యూట్‌ ఆఫ్‌ ఆయిల్‌ ఫామ్‌ రిసెర్చ్‌(ఐఐఓపీఆర్‌) కొత్త మార్గదర్శకాలను సూచించింది. ఐఐఓపీఆర్‌ శాస్త్రవేత్తల ఈ ముందడగుతో హాఫ్‌ టైప్‌ మొక్కలు, నాసిరకం మొక్కలు ఇక రైతుల దరచేరవు.

• ఐఐఓపీఆర్‌ శాస్త్రవేత్తల ముందడగు
• హాఫ్‌టైప్‌ మొక్కలు ఇక రైతుల దరిచేరవు..
• 25 శాతం కల్లింగ్‌ మొక్కలు వస్తే ఆ బ్యాచ్‌ రిజెక్ట్‌

దమ్మపేటరూరల్‌, ఫిబ్రవరి 14: పామాయిల్‌ నర్సరీ నిర్వహణకు ఇండియన్‌ ఇనిస్ట్యూట్‌ ఆఫ్‌ ఆయిల్‌ ఫామ్‌ రిసెర్చ్‌(ఐఐఓపీఆర్‌) కొత్త మార్గదర్శకాలను సూచించింది. ఐఐఓపీఆర్‌ శాస్త్రవేత్తల ఈ ముందడగుతో హాఫ్‌ టైప్‌ మొక్కలు, నాసిరకం మొక్కలు ఇక రైతుల దరచేరవు. తెలంగాణ ఆయిల్‌ఫెడ్‌ పరిధిలోని రైతులకు ఆయిల్‌ఫెడ్‌ నర్సరీల నుంచి వందల ఎకరాలకు హాఫ్‌టైప్‌ మొక్కలు చేరడం వల్ల రైతులు తీవ్రంగా నష్టపోతున్నారు.

ఈ విషయమై ప్రభుత్వరంగ సంస్థ ఆయిల్‌ఫెడ్‌ యాజమాన్యం, తెలంగాణ ఉద్యానశాఖలకు రైతులు మొరపెట్టినా పట్టించుకోవడం లేదు. హాఫ్‌టైప్‌ మొక్కల సమస్యతో ఖమ్మంజిల్లాకు చెందిన ఓ రైతు న్యాయ పోరాటం ప్రారంభించాడు. నాసిరకం మొక్కలతో రైతులు ఆర్థికంగా నష్టపోవడంతోపాటు సదరు పామాయిల్‌ కంపెనీకి సుమారు 30ఏళ్లపాటు పామాయిల్‌ గెలలు రాకుండా నష్టం కలుగుతున్నదని వ్యవసాయశాఖ ముఖ్యనేతకు నిపుణులు చెప్పినా వినడం లేదని తెలుస్తోంది. హాఫ్‌టైప్‌ మొక్కలను చూసి కొత్త రైతులు పామాయిల్‌ సాగుకు ముందుకురారని నేతలు, అధికారుల ఎదుట మొత్తుకున్నా ఫలితం ఉండటం లేదని వాపోతున్నారు.

కొత్త మార్గదర్శకాలు ఇవే..

• 25 శాతం కల్లింగ్‌ మొక్కలు వస్తే ఆ బ్యాచ్‌ మొక్కలను రైతులకు ఇవ్వకుండా తిరస్కరించాలి
• ప్రాథమిక నర్సరీలో సుమారు 10-15 శాతం అసాధారణ లక్షణాలు వచ్చే అవకాశం ఉంది. వాటిని గుర్తించి కాల్చివేయాలి.
• విదేశాల నుంచి దిగుమతి చేసుకున్న పామాయిల్‌ మొక్కలను నర్సరీ స్థాయిలో 5-10 శాతం కల్లింగ్‌ మొక్కలు ఉంటే వాటిని వేరు చేసి నాణ్యమైన మొక్కలను రైతులకు ఇవ్వడానికి సిఫార్సు చేయాలి.
• కల్లింగ్‌ మొక్కలు 25శాతం మించితే సదరు బ్యాచ్‌ను మొత్తం తిరస్కరించాలి. తిరస్కరించిన బ్యాచ్‌ మొలకలను సరఫరా చేసిన సంస్థ నుంచి పరిహారంగా తిరిగి వేరే మొక్కలను తీసుకోవాలి.
• సన్నని, బలహీనకాండం కలిగిన మొక్కలను వేరు చేసి కాండం బలంగా ఉండి 12 నెలలు పూర్తి చేసుకున్న మొక్కలను మాత్రమే రైతులకు ఇవ్వాలి.
• ఈ నిబంధనల ప్రకారం రేగళ్లపాడు నర్సరీలో మొక్కలన్నీ ధ్వంసం చేసి కంపెనీ నుంచి పరిహారం రాబట్టాలి. ఇప్పటికే సరఫరా చేసిన మొక్కలను శాస్త్రవేత్తలతో తనిఖీ చేయించి రైతులకు న్యాయం చేయాలి.