Karepalli | కారేపల్లి మండలంలో ఘనంగా ‘ఎంగిలిపూల బతుకమ్మ’ వేడుకలు..!

కారేపల్లి, అక్టోబర్ 10: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలు ఘనంగా ప్రారంభమయ్యాయి. తొలిరోజైన ఎంగిలిపూల బతుకమ్మ సంబురాల్లో మండలంలోని వివిధ గ్రామాల్లో మహిళలు భక్తిశ్రద్ధలతో, ఉత్సాహంగా పాల్గొన్నారు.

కారేపల్లి, అక్టోబర్ 10: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలు ఘనంగా ప్రారంభమయ్యాయి. తొలిరోజైన ఎంగిలిపూల బతుకమ్మ సంబురాల్లో మండలంలోని వివిధ గ్రామాల్లో మహిళలు భక్తిశ్రద్ధలతో, ఉత్సాహంగా పాల్గొన్నారు. ప్రకృతిలో లభించే రంగురంగుల, తీరొక్క పూలతో బతుకమ్మలను అందంగా పేర్చి ప్రత్యేక పూజలు నిర్వహించారు. తెలంగాణ ఆడపడుచుల ఆత్మీయతకు, ప్రకృతి ఆరాధనకు ప్రతీకగా నిలిచే బతుకమ్మను మహిళలు సంప్రదాయబద్ధంగా జరుపుకున్నారు.

ఎంగిలిపూల బతుకమ్మను పునస్కరించుకొని తంగేడు, గునుగు, బంతి, చామంతి తదితర పూలతో మహిళలు బతుకమ్మలను ఆకర్షణీయంగా అలంకరించారు. అనంతరం బతుకమ్మల చుట్టూ చేరి పురాణ, ఇతిహాసాల పాటలు పాడుతూ, చప్పట్లు కొడుతూ ఆనందోత్సాహాలతో వేడుకల్లో పాల్గొన్నారు. ప్రతి ఏటా ఆశ్వయుజ మాసంలో తొమ్మిది రోజులపాటు నిర్వహించే బతుకమ్మ పండుగలో ఎంగిలిపూల బతుకమ్మకు ప్రత్యేక ప్రాధాన్యం ఉంది.

అడవి పూలను పూజిస్తూ ప్రకృతికి కృతజ్ఞతలు తెలిపే ఈ పండుగ తెలంగాణ మహిళల జీవనశైలి, సంస్కృతి, సంప్రదాయాలను ప్రతిబింబిస్తుంది. కుటుంబ సభ్యులు, ఇరుగుపొరుగు మహిళలు ఒకచోట చేరి బతుకమ్మ వేడుకల్లో పాల్గొనడంతో గ్రామాల్లో పండుగ వాతావరణం నెలకొంది. మహిళలు సంప్రదాయ దుస్తులు ధరించి బతుకమ్మలను పేర్చి ఆనందంగా ఆడిపాడడంతో మండలంలోని పలు గ్రామాల్లో సందడి కనిపించింది. తెలంగాణ సంస్కృతిని భావితరాలకు అందించడంలో బతుకమ్మ పండుగ కీలక పాత్ర పోషిస్తుందని పలువురు పేర్కొన్నారు.