కోట మైసమ్మ జాతరకు పోటెత్తిన భక్తజనం

సింగరేణి మండలం ఉసిరికాయలపల్లి కోట మైసమ్మ జాతరకు భక్తజనం పోటెత్తారు. బుధవారం వివిధ ప్రాంతాల నుండి వేలాదిగా తరలివచ్చిన భక్తులు కోట మైసమ్మ అమ్మవారిని దర్శించుకుని ప్రత్యేక పూజలు నిర్వహించారు. తమ కుటుంబాలు సుఖసంతోషాలతో ఉండాలని, పాడిపంటలు సమృద్ధిగా పండాలని...

కారేపల్లి, అక్టోబర్ 21 : సింగరేణి మండలం ఉసిరికాయలపల్లి కోట మైసమ్మ జాతరకు భక్తజనం పోటెత్తారు. బుధవారం వివిధ ప్రాంతాల నుండి వేలాదిగా తరలివచ్చిన భక్తులు కోట మైసమ్మ అమ్మవారిని దర్శించుకుని ప్రత్యేక పూజలు నిర్వహించారు. తమ కుటుంబాలు సుఖసంతోషాలతో ఉండాలని, పాడిపంటలు సమృద్ధిగా పండాలని, ఆయురారోగ్యాలతో జీవించాలని అమ్మవారిని వేడుకుంటూ మొక్కులు చెల్లించుకున్నారు. ఉదయం నుంచే భక్తులు ఆలయానికి చేరుకోవడంతో పరిసర ప్రాంతాలు సందడిగా మారాయి. భక్తుల రాకతో ఆలయ ప్రాంగణం కిటకిటలాడగా, జాతర ప్రాంతమంతా పండుగ వాతావరణం నెలకొంది. కుటుంబ సమేతంగా తరలివచ్చిన భక్తులు అమ్మవారిని దర్శించుకుని తమ సంప్రదాయాల ప్రకారం పూజలు నిర్వహించారు.

కోట మైసమ్మ తల్లిపై భక్తులకు ఉన్న విశ్వాసం, నమ్మకానికి జాతరకు తరలివచ్చిన జనసందోహం నిదర్శనంగా నిలిచింది. భద్రతా ఏర్పాట్లను పర్యవేక్షించిన ఏసీపీ జాతరకు భారీ సంఖ్యలో భక్తులు తరలివస్తుండటంతో పోలీసు శాఖ భద్రతా ఏర్పాట్లపై ప్రత్యేక దృష్టి సారించింది. ఖమ్మం రూరల్ ఏసీపీ తిరుపతిరెడ్డి జాతర ప్రాంగణాన్ని సందర్శించి పోలీసు బందోబస్తును పర్యవేక్షించారు. విధుల్లో ఉన్న స్థానిక పోలీసు అధికారులతో మాట్లాడి పరిస్థితులను సమీక్షించారు. భక్తుల రద్దీకి అనుగుణంగా సిబ్బంది అప్రమత్తంగా ఉండాలని, విధుల నిర్వహణలో సమన్వయంతో వ్యవహరించాలని సూచించారు. అమ్మవారి దర్శనానికి వచ్చే భక్తులకు ఎలాంటి ఇబ్బందులు కలగకుండా చూడాలని, రద్దీని క్రమబద్ధీకరిస్తూ అవసరమైన చర్యలు చేపట్టాలని ఆదేశించారు. జాతరలో ఎలాంటి అవాంఛనీయ సంఘటనలు చోటుచేసుకోకుండా నిరంతరం నిఘా ఉంచాలని పోలీసు సిబ్బందికి సూచనలు చేశారు. జాతర మరో రెండు రోజులపాటు కొనసాగనుంది.