రాష్ట్రస్థాయి ఖో-ఖో పోటీలకు భీమవరం విద్యార్థినులు

రాష్ట్రస్థాయి జూనియర్ ఖో-ఖో పోటీలకు ఖమ్మం జిల్లా ఎర్రుపాలెం మండలం భీమవరం గ్రామానికి చెందిన ఐదుగురు విద్యార్థినులు ఎంపికయ్యారు. ఈ నెల 11న కల్లూరు మినీ స్టేడియంలో నిర్వహించిన ఉమ్మడి ఖమ్మం జిల్లా ఖో-ఖో జట్టు ఎంపిక పోటీల్లో జిల్లా నుంచి....

ఎర్రుపాలెం, అక్టోబర్ 13 : రాష్ట్రస్థాయి జూనియర్ ఖో-ఖో పోటీలకు ఖమ్మం జిల్లా ఎర్రుపాలెం మండలం భీమవరం గ్రామానికి చెందిన ఐదుగురు విద్యార్థినులు ఎంపికయ్యారు. ఈ నెల 11న కల్లూరు మినీ స్టేడియంలో నిర్వహించిన ఉమ్మడి ఖమ్మం జిల్లా ఖో-ఖో జట్టు ఎంపిక పోటీల్లో జిల్లా నుంచి 70 మంది విద్యార్థినులు పాల్గొన్నారు. వీరిలో ప్రతిభ కనబరిచిన క్రీడాకారిణులను ఖమ్మం జిల్లా జట్టుకు ఎంపిక చేసినట్లు పాఠశాల ప్రధానోపాధ్యాయుడు సీహెచ్ ఉపేందర్, పీడీ నరాల సాంబశివారెడ్డి తెలిపారు.భీమవరం గ్రామంలోని వేమిరెడ్డి వెంకటరెడ్డి జిల్లా పరిషత్ ఉన్నత పాఠశాలకు చెందిన శీల తేజశ్రీ, గండు రాధిక, తల్లపురెడ్డి సంజన, శీల శ్రావణి, వేమిరెడ్డి మౌనిక జిల్లా జట్టులో స్థానం సంపాదించారు.

ఎంపికైన విద్యార్థినులు ఈ నెల 15 నుంచి 17వ తేదీ వరకు హైదరాబాద్‌లోని సరూర్‌నగర్ ఇండోర్ స్టేడియంలో జరిగే 45వ రాష్ట్రస్థాయి జూనియర్ ఖో-ఖో పోటీల్లో పాల్గొననున్నారు. రాష్ట్రస్థాయి పోటీల్లోనూ ప్రతిభ కనబరిచి గ్రామానికి, మండలానికి మంచి పేరు తీసుకురావాలని వారు ఆకాంక్షించారు. రాష్ట్రస్థాయి పోటీలకు ఎంపికైన విద్యార్థినులను సర్పంచ్ వంగల నాగేశ్వరరావు, పాఠశాల హెచ్ఎం. సీహెచ్ ఉపేందర్, పీఈటి నరాల సాంబశివారెడ్డి, ఏఏపీసీ చైర్మన్ తులసమ్మ, గ్రామ పెద్దలు, పాఠశాల ఉపాధ్యాయులు, సిబ్బంది, గ్రామస్తులు అభినందించారు.