వృద్ధురాలిపై చిత్రహింసలకు పాల్పడిన వారిపై కేసు నమోదు

దెయ్యం వదిలించే పేరుతో వృద్ధురాలిపై చిత్రహింసలకు పాల్పడిన అమానుష సంఘటనకు సంబంధించి పాల్వంచ డీఎస్పీ సతీశ్‌కుమార్ స్పందించారు. ఈ ఘటనను సుమోటోగా తీసుకుని సంబంధించిన కారకులపై మంగళవారం కేసు నమోదు చేశారు.

బూర్గంపహాడ్, సెప్టెంబర్ 22 : దెయ్యం వదిలించే పేరుతో వృద్ధురాలిపై చిత్రహింసలకు పాల్పడిన అమానుష సంఘటనకు సంబంధించి పాల్వంచ డీఎస్పీ సతీశ్‌కుమార్ స్పందించారు. ఈ ఘటనను సుమోటోగా తీసుకుని సంబంధించిన కారకులపై మంగళవారం కేసు నమోదు చేశారు. బూర్గంప‌హాడ్‌ మండల పరిధిలోని జింకలగూడెం గ్రామానికి చెందిన వృద్ధురాలు షేక్ షకీనాబిని చేతబడి నెపంతో అదే గ్రామానికి చెందిన కొందరు వ్యక్తులు తాళ్లతో కొడుతూ ఆమెను చెట్టు ఎక్కిస్తూ కింద మేకులు కొడుతున్న వీడియో సోషల్ మీడియాలో సోమవారం రావడం జరిగింది. ఈ సంఘటనపై బూర్గంపహాడ్ పోలీసులు సుమోటోగా కేసు నమోదు చేసి దర్యాప్తు చేపట్టారు.

ఈ సంఘటన జూలై నెలలో జరిగిందని, సదరు వృద్ధురాలు ఆరోగ్యం బాగాలేకపోవడంతో ఆమె బంధువులు ఇలా మూఢనమ్మకంతో తనని తాళ్లతో కొట్టడం, చెట్టు ఎక్కిస్తూ, చెట్టుకు మేకులు కొట్టడం జరిగిందని డీఎస్పీ సతీష్ కుమార్ తెలిపారు. ఈ ఘటనకు సంబంధించి కారకులైన షేక్ మదర్, షేక్ ఫయాజ్, కరీముల్లా, మరికొంతమందిపై కేసులు నమోదు చేయడం జరిగిందని తెలిపారు. మూఢనమ్మకాలు, చేతబడి పేరుతో ఎవరినైనా హింసించినా, దుర్భాషలాడినా వారిపై చట్టరీత్యా చర్యలు తీసుకుంటామని డీఎస్పీ హెచ్చరించారు.