అనధికారిక యూటర్న్‌తో ప్రమాదాలు

సింగరేణి కొత్తగూడెం ఏరియా నూతన జీఎం కార్యాలయం సమీపంలోని అనధికారిక యూటర్న్‌ వాహనదారులకు ప్రమాదకరంగా మారింది. ఉద్యోగుల సౌకర్యార్థం కార్యాలయం ప్రారంభ సమయంలో ఏర్పాటు చేసిన ఈ యూటర్న్‌ వద్ద కొద్ది రోజులకే ప్రమాదం జరగడంతో అధికారులు కర్రలతో తాత్కాలికంగా...

– త్రీ ఇంక్లైన్‌ వద్ద వరుస ప్రమాదాలు
– కర్రలతో తాత్కాలికంగా మూసివేసిన పోలీసులు
– శాశ్వత పరిష్కారం ఎప్పుడు ?

రుద్రంపూర్, అక్టోబర్ 15 : సింగరేణి కొత్తగూడెం ఏరియా నూతన జీఎం కార్యాలయం సమీపంలోని అనధికారిక యూటర్న్‌ వాహనదారులకు ప్రమాదకరంగా మారింది. ఉద్యోగుల సౌకర్యార్థం కార్యాలయం ప్రారంభ సమయంలో ఏర్పాటు చేసిన ఈ యూటర్న్‌ వద్ద కొద్ది రోజులకే ప్రమాదం జరగడంతో అధికారులు కర్రలతో తాత్కాలికంగా మూసివేశారు. అయితే, కొంతకాలంగా అక్కడి అడ్డంకులు తొలగిపోవడంతో వాహనదారులు మళ్లీ యూటర్న్‌ను వినియోగిస్తున్నారు. దీంతో ప్రమాదాలు పునరావృతమవుతున్నాయి. గురువారం సత్తుపల్లి నుండి కొత్తగూడెం వెళ్తున్న కారు ముందు వెళ్తున్న ఆటో ఒక్కసారిగా యూటర్న్‌ తీసుకోవడంతో దాన్ని ఢీకొట్టింది. ఈ ఘటనలో ఆటో డ్రైవర్‌ రోడ్డుపై పడిపోగా, అదుపుతప్పిన ఆటో సుమారు 200 మీటర్ల దూరంలో ఉన్న ఎంబీటీసీ కార్యాలయం వద్ద పోసిన మట్టి కుప్పలను ఢీకొని ఆగింది. ఆ సమయంలో అటువైపు ఇతర వాహనాలు రాకపోవడంతో పెను ప్రమాదం తప్పింది. ఆటో ధ్వంసం కాగా, డ్రైవర్‌కు గాయాలయ్యాయి.

తాత్కాలికంగా మూసివేసిన పోలీసులు

ప్రమాదం జరిగిన తీరును పరిశీలించిన కొత్తగూడెం టూ టౌన్‌ ఎస్‌హెచ్‌ఓ ఎస్‌.కె.యాసిన్‌.. శాశ్వతంగా యూటర్న్‌ మూసివేసే చర్యలు చేపట్టే వరకు కర్రలతో తాత్కాలికంగా మూసివేయించారు. వరుస ప్రమాదాలు జరుగుతున్న నేపథ్యంలో సంబంధిత అధికారులు స్పందించి యూటర్న్‌ సమస్యకు శాశ్వత పరిష్కారం చూపాలని వాహనదారులు కోరుతున్నారు.