ఇన్‌స్పైర్‌ @ ఆన్‌లైన్‌

ఎంపికైన ప్రాజెక్ట్‌లకు రూ.10 వేలు అకౌంట్‌లో జమ
సెప్టెంబర్‌ 21 నుంచి జిల్లా స్థాయి ఇన్‌స్పైర్‌ నిర్వహణ
ఖమ్మం ఎడ్యుకేషన్‌, ఆగస్టు 12;ప్రకృతిని శోధించి.. మేధస్సును మదించి.. నిరంతర పరిశోధనలతో బాలశాస్త్రవేత్తలు రూపొందించే ప్రదర్శనలకు ఈసారి ఆన్‌లైన్‌ వేదిక కానున్నది. బాల్యం నుంచే విద్యార్థుల్లో శాస్త్రీయ భావనలు పెంపొందించి.. శాస్త్రవేత్తలుగా తీర్చిదిద్దేందుకు ఇన్‌స్పైర్‌ ప్రదర్శన ప్రవేశపెట్టారు. అయితే, కొవిడ్‌-19 నేపథ్యంలో ప్రదర్శనలా కాకుండా వీడియో రూపంలో అందజేయాలని ప్రధానోపాధ్యాయులకు సూచించారు. సెప్టెంబర్‌ 21వ తేదీ నుంచి అక్టోబర్‌ 5వ తేదీలోపు ఇన్‌స్పైర్‌ మానక్‌యాప్‌లో విద్యార్థుల ప్రాజెక్ట్‌లను అప్‌లోడ్‌ చేయాలని డీఈవో యాదయ్య ప్రధానోధ్యాయులను ఆదేశించారు.

2020-21 ఇన్‌స్పైర్‌ అవార్డ్సు మేళాకు 136 ప్రాజెక్ట్‌లను ఎంపిక చేశారు. ఎంపికైన ప్రాజెక్ట్‌లకు రూ.10వేలు మంజూరు చేశారు. ఇప్పటికే రూ.10 వేలను విద్యార్థుల అకౌంట్‌లో వేశారు. అకౌంట్‌ కరెక్ట్‌గా ఉండి జమకాని విద్యార్థులు తమ అకౌంట్‌ వివరాలను కవరింగ్‌ లెటర్‌ ద్వారా డీఈవో కార్యాలయంలో అందజేయాలి. ఈ నిధులకు అనుగుణంగా ప్రాజెక్ట్‌లు రూపొందించాలి. పరిశోధనల వేదిక ఆన్‌లైన్‌ విధానంలో జరగనుండడంతో.. అందుకు అనుగుణంగా విద్యార్థులను సన్నద్దం చేయాలి. ఇన్నోవేషన్‌ కలిగిన అంశాన్ని తయారు చేయించడంతోపాటు విద్యార్థికి అందుకు అనుగుణంగా ఉన్న అంశాలపై ఆలోచన కల్పించాలి.

ప్రాజెక్ట్‌ వివరాలు అందించాలి..
జిల్లాస్థాయి మేళాకు ఎంపికైన ఇన్‌స్పైర్‌ అవార్డ్స్‌ ప్రాజెక్ట్‌ల వివరాలను విద్యార్థి, గైడ్‌ టీచర్స్‌ 30 ఎంబీకి మించకుండా ఉండాలి. ఫొటోలు 3 నుంచి 4 వరకు, ఆడియో 2 నిమిషాల కంటే తక్కువగా ఉండేట్లు తయారు చేసుకోవాలని మార్గదర్శకాల్లో సూచించారు. జిల్లాస్థాయి ప్రదర్శనలో పాల్గొనే విద్యార్థులు సెప్టెంబర్‌ 2వ తేదీలోగా యాప్‌లో వివరాలు అప్‌లోడ్‌ చేయాలి. ఇందులో ఉత్తమమైన వాటిని ఎంపిక చేసి రాష్ట్రస్థాయికి పంపించనున్నారు. ప్రాజెక్ట్‌లోని అంశాలను వివరిస్తూ విద్యార్థులు అందజేసే వీడియో ఆధారంగానే విజేతలను ఎంపిక చేయనున్నారు.

దరఖాస్తుల ఆహ్వానం..
2021-22 విద్యాసంవత్సరానికి ఇన్‌స్పైర్‌ మానక్‌ అవార్డు కోసం జిల్లాలోని అన్ని యాజమాన్యాల పరిధి పాఠశాలల విద్యార్థులు పేర్లు నమోదు చేసుకోవాలి. ఉన్నత పాఠశాలలు 6 నుంచి 10వ తరగతి వరకు 5 ప్రదర్శనలు.. ప్రాథమికోన్నత పాఠశాలలు 6, 7వ తరగతి నుంచి 2 ప్రదర్శనలు అప్‌లోడ్‌ చేయాలి. విద్యార్థి జాతీయ బ్యాంక్‌ అకౌంట్‌ వివరాలు, ఖాతాలు లేని విద్యార్థులకు ఖాతాలు తెరిచేలా ప్రధానోపాధ్యాయులు చర్యలు తీసుకోవాలి. అక్టోబర్‌ 15వ తేదీ వరకు ఇన్‌స్పైర్‌ మానక్‌ వెబ్‌సైట్‌లో పాఠశాల ఐడీ, పాస్‌వర్డ్‌ ఉపయోగించి నమోదు చేయాలి. ఇతర వివరాలకు జిల్లా సైన్స్‌ అధికారి సైదులును సంప్రదించాలి.

• డీఈవో యాదయ్య