Godavarikhani | అగ్రిగోల్డ్ బాధితులకు ప్రభుత్వమే న్యాయం చేయాలి.. ప్రజావాణిలో ఫిర్యాదు చేసిన సామాజిక కార్యకర్త

అగ్రి గోల్డ్ బాధితులు కోల్పోయిన సొమ్మును తిరిగి ఇప్పించి న్యాయం చేయాల్సిన బాధ్యత తెలంగాణ ప్రభుత్వంపై ఉందని ఫైట్ ఫర్ బెటర్ సొసైటీ అధ్యక్షులు మద్దెల దినేష్ డిమాండ్ చేశారు.  కలెక్టరేట్ లో జరిగిన ప్రజావాణిలో బాధితుల పక్షాన సోమవారం వినతి పత్రం అందజేశారు.

• ఇచ్చిన హామీని మరిచిన సీఎం రేవంత్ రెడ్డి
• మాట నిలబెట్టుకోవాలని సూచన

Godavarikhani | కోల్ సిటీ, అక్టోబర్ 12 : అగ్రి గోల్డ్ బాధితులు కోల్పోయిన సొమ్మును తిరిగి ఇప్పించి న్యాయం చేయాల్సిన బాధ్యత తెలంగాణ ప్రభుత్వంపై ఉందని ఫైట్ ఫర్ బెటర్ సొసైటీ అధ్యక్షులు మద్దెల దినేష్ డిమాండ్ చేశారు.  కలెక్టరేట్ లో జరిగిన ప్రజావాణిలో బాధితుల పక్షాన సోమవారం వినతి పత్రం అందజేశారు. దినేష్ మాట్లాడుతూ కాంగ్రెస్ ప్రభుత్వం అధికారంలోకి వస్తే వంద రోజుల్లో అగ్రి గోల్డ్ బాధితులకు న్యాయం చేస్తామని హామీ ఇచ్చిన రేవంత్ రెడ్డి అన్ని వర్గాల ప్రజలను మోసం చేసినట్టే అగ్రి గోల్డ్ బాధితులను నమ్మించి మోసం చేశాడని ఆరోపించారు. సంస్థలో డబ్బులు పొదుపు చేస్తే కుటుంబ అవసరాలకు, పిల్లల ఉన్నత చదువులకు ఉపయోగపడతానే లక్షలాది మంది ప్రజలు పెట్టుబడులు పెట్టి మోసపోయారన్నారు.

ఆంధ్రప్రదేశ్ రాష్ట్రంలో అక్కడి ప్రభుత్వం బాధితులకు అండగా నిలిచే చర్యలు చేపడుతుందనీ, ఆ ప్రభుత్వంను చూసైనా రేవంత్ రెడ్డి ప్రభుత్వం చొరవ తీసుకోవాలని కోరారు. నిపుణులతో ప్రత్యేక కమిటీ ఏర్పాటు చేయాలని పేర్కొన్నారు. తెలంగాణలో సుమారు 3లక్షల మంది బాధితులు ఉన్నారనీ, అగ్రి గోల్డ్ ఆస్తులను చట్టబద్ధంగా వేలం వేసి బాధితులకు రావల్సిన సొమ్మును తిరిగి చెల్లించేలా చర్యలు తీసుకోవాలని కోరారు. లేనిపక్షంలో బాధితుల పక్షాన పోరాటాలను ఉధృతం చేస్తామని హెచ్చరించారు.