లండన్: నోబెల్ శాంతి బహుమతి గ్రహీత యూసుఫ్జాయి మలాలా పెళ్లి చేసుకున్నది. బర్మింగ్హామ్లో నిఖా వేడుక చాలా సింపుల్గా జరిగింది. ఆమె భర్త పేరు అసర్ మాలిక్. అయితే మాలిక్ ఎవరని ప్రస్తుతం ఇంటర్నెట్లో జోరుగా సెర్చ్ సాగుతోంది. పెళ్లి చేసుకున్న తర్వాత ఇద్దరూ తమ పెళ్లి ఫోటోలను ట్విట్టర్లో పోస్టు చేశారు. మలాలా భర్త అసర్ మాలిక్ ప్రస్తుతం పాకిస్థాన్ క్రికెట్ బోర్డు హై పర్ఫార్మెన్స్ సెంటర్లో జనరల్ మేనేజర్గా చేస్తున్నాడు. గత ఏడాది మే నెలలో ఆయన పాకిస్థాన్ క్రికెట్ బోర్డులో ఉద్యోగిగా చేరాడు. పాకిస్థాన్ సూపర్ లీగ్లో ఆడుతున్న ముల్తాన్ సుల్తాన్ జట్టుకు కూడా పనిచేశాడు. ముల్తాన్ సుల్తాన్ జట్టుకు అతను ఆపరేషనల్ మేనేజర్గా చేశాడు. గతంలో అసర్ మాలిక్.. ప్లేయర్ మేనేజ్మెంట్ ఏజెన్సీని కూడా నడిపారు. లాహోర్ యూనివర్సిటీ ఆఫ్ మేనేజ్మెంట్ సైన్సెస్ నుంచి 2012లో ఆర్థికశాస్త్రం, రాజనీతి శాస్త్రం నుంచి బ్యాచిలర్స్ డిగ్రీ పట్టా పొందారు.
పాకిస్థాన్లో బాలికల విద్యాహక్కు గురించి మలాలా పోరాటం చేశారు. ఖైబర్ ఫక్తున్సాలోని స్వాట్ వ్యాలీ ఆమె సొంతం ప్రదేశం. అయితే అక్కడ తాలిబన్ల అరాచకం కొనసాగేది. అమ్మాయిల చదువును తాలిబన్లు అడ్డుకునేవారు. ఆ సమయంలో మలాలా ఉద్యమం చేపట్టారు. దానికి ప్రతీకారంగా 2012, అక్టోబర్ 9న మలాలాపై తాలిబన్ల దాడి చేశారు. ఆ దాడిలో మలాలా తలకు తీవ్ర గాయమైంది. బుల్లెట్లు దిగడంతో మలాలా కొన్ని రోజులు కోమాలోకి వెళ్లింది. తొలుత రావల్పిండిలో చికిత్స తీసుకున్నది. బర్మింగ్హామ్లో ఆమె పుర్రెకు సర్జరీ చేశారు. మహిళల విద్యాహక్కు గురించి పోరాటం చేసిన మలాలాకు 2014లో నోబెల్ శాంతి బహుమతి దక్కింది.