ఇరాన్పై అమెరికా దాడులు
స్వల్ప విరామం తర్వాత హొర్ముజ్ జలసంధిలోని ఇరాన్కు చెందిన ఖేష్మ్ దీవిపై అమెరికా మంగళవారం పలుమార్లు దాడులు చేసిందని హొర్ముజ్గాన్ ప్రావిన్స్ డిప్యూటీ గవర్నర్ అహ్మద్ నఫీసీ తెలిపారు.
- ఖేష్మ్ దీవిపై పలుమార్లు విరుచుకుపడ్డ అగ్రరాజ్యం
- నివాస, వాణిజ్య ప్రాంతాలకు నష్టం లేదన్న ఇరాన్
టెహ్రాన్, నవంబర్ 17: స్వల్ప విరామం తర్వాత హొర్ముజ్ జలసంధిలోని ఇరాన్కు చెందిన ఖేష్మ్ దీవిపై అమెరికా మంగళవారం పలుమార్లు దాడులు చేసిందని హొర్ముజ్గాన్ ప్రావిన్స్ డిప్యూటీ గవర్నర్ అహ్మద్ నఫీసీ తెలిపారు. బహ్రెయిన్లోని అమెరికా కేంద్రాలను ఇరాన్ మంగళవారం లక్ష్యంగా చేసుకున్న కొద్దిసేపటికే ఈ దాడులు జరిగాయి. గత నాలుగు రోజుల్లో బహ్రెయిన్పై ఇరాన్ చేసిన మూడో దాడి ఇదని సమాచారం. ఖేష్మ్ దీవిలోని నివాస, వాణిజ్య, మౌలిక సదుపాయాల ప్రాంతాలకు ఎలాంటి నష్టం జరగలేదని నఫీసీ తెలిపారు.
అధికారిక ఐఆర్ఎన్ఏ వార్తా సంస్థతో ఆయన మాట్లాడుతూ, ‘ఖేష్మ్ దీవిలోని ప్రాంతాలపై అమెరికా చేసిన దాడుల వల్ల నివాస, వాణిజ్య, మౌలిక సదుపాయాలకు ఎలాంటి నష్టం జరగలేదు’ అన్నారు. సోషల్ మీడియా వీడియోల్లో దీవి నుంచి పొగలు ఎగసిపడుతున్నట్లు కనిపించింది. ‘ఖేష్మ్ దీవిలో పరిస్థితి అదుపులోనే ఉన్నది. సహాయక, సేవా, కార్యనిర్వాహక సంస్థలన్నీ పూర్తి అప్రమత్తతలో ఉన్నాయి’ అని నఫీసీ తెలిపారు. మంగళవారం సాయంత్రం ఖేష్మ్లో కనీసం ఐదు లేదా ఆరు పేలుళ్ల శబ్దాలు వినిపించాయని ఐఆర్ఎన్ఏ తెలిపింది.
బహ్రెయిన్పై ఇరాన్ అటాక్
అంతకుముందు బహ్రెయిన్లోని అమెరికా రాడార్ వ్యవస్థ కేంద్రంపై డ్రోన్లతో దాడి చేశామని ఇరాన్ రివల్యూషనరీ గార్డ్స్ ప్రకటించాయి. ‘రివల్యూషనరీ గార్డ్స్కు చెందిన యుద్ధ డ్రోన్లు మంగళవారం ఉదయం బహ్రెయిన్లోని షేక్ ఈసా ఎయిర్ బేస్లో అమెరికా దళాలు నిర్వహిస్తున్న రాడార్ వ్యవస్థను లక్ష్యంగా చేసుకొని కచ్చితమైన ఆపరేషన్ నిర్వహించాయి’ అని రివల్యూషనరీ గార్డ్స్ నిర్వహిస్తున్న సెపా వార్తా వెబ్సైట్ తెలిపింది. ఇరాన్ గగనతలాన్ని అమెరికా సైనిక డ్రోన్లు పదేపదే ఉల్లంఘిస్తున్నందుకు ప్రతిస్పందనగానే ఈ దాడి చేశామని సెపా వెబ్సైట్ పేర్కొన్నది. ఇటీవలి వారాల్లో ఇరాన్, అమెరికా మధ్య పరస్పర దాడులు క్రమంగా తీవ్రతరం అయ్యాయి. నవంబర్ 2న హొర్ముజ్ జలసంధిలోని కీలక దీవిపై అమెరికా దాడి చేసింది.
2026 ఫిబ్రవరిలో అమెరికా-ఇరాన్ యుద్ధం మొదలైనప్పటి నుంచి, ఇస్లామిక్ రిపబ్లిక్ అయిన ఇరాన్ అనుమతించిన మార్గాల్లోనే నౌకలు ప్రయాణించాలని టెహ్రాన్ పట్టుబడుతున్నది. అనుమతి లేని మార్గాల్లో వెళ్తున్నాయని తాను పేర్కొన్న నౌకలపై ఇరాన్ తరచూ దాడులు చేస్తున్నది. ఇటీవల జలసంధిలో నౌకలకు మంటలు అంటుకున్నాయని, అవి తరచూ మైన్లను తాకడం వల్లేనని ఇరాన్ పేర్కొంటున్నది. దీనికి ప్రతిస్పందనగా ఇరాన్ ఓడరేవులపై అమెరికా నౌకాదళ దిగ్బంధనం విధించింది. సాధారణంగా ప్రపంచ చమురు సరఫరాల్లో సుమారు ఐదో వంతు రవాణా అయ్యే ఈ జలసంధి గుండా ట్యాంకర్ల ప్రయాణానికి అమెరికా సహకరిస్తున్నది. జలమార్గంలోని అన్ని మైన్లను తమ దళాలు తొలగించాయని అమెరికా తెలిపింది.
ట్రంప్ అధికారులపై ఇరాన్ డర్టీ బాంబ్!
ట్రంప్ ప్రభుత్వంలోని సీనియర్ అధికారులను లక్ష్యంగా చేసుకుని వాషింగ్టన్లో డర్టీ బాంబ్ లేదా రసాయన ఆయుధాలతో దాడి చేసే అవకాశాలను ఇరాన్ పరిశీలిస్తున్నట్టు అమెరికా నిఘా సంస్థలకు తాజాగా సమాచారం అందింది. అయితే, ఇలాంటి దాడి అమలు చేసే సామర్థ్యం ఇరాన్కు ఉన్నదా అన్నదానిపై సందేహాలు కొనసాగుతున్నాయి. దాడిని వెంటనే చేపట్టకున్నా, భవిష్యత్తు కోసం మార్గాలను సిద్ధంగా ఉంచుకోవడమే ఈ ప్రణాళికల ఉద్దేశంగా కనిపిస్తున్నదని సీఎన్ఎన్ తెలిపింది. నిర్దిష్ట లక్ష్యాలు, ప్రాంతాలను ఈ ప్రణాళికల్లో గుర్తించినట్టు సమాచారం రావడంతో అమెరికా అధికారుల భద్రతను పెంచారు. అమెరికా సైనిక దాడులు, ఆర్థిక దిగ్బంధనాన్ని ఎదుర్కొంటున్న ఇరాన్.. ఘర్షణను మరింత పెంచేందుకు సిద్ధంగా ఉన్నదనడానికి ఈ నిఘా సమాచారం సంకేతమని అమెరికా అధికారులు భావిస్తున్నారు. అయితే ఈ ఆరోపణలను ఐక్యరాజ్యసమితిలోని ఇరాన్ ప్రతినిధి బృందం తోసిపుచ్చింది.
Read Today's Latest International News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా
Watch: వేగంగా వస్తున్న కారు నుంచి తప్పించుకునేందుకు మహిళ యత్నం.. ఆ తర్వాత ఏం జరిగిందంటే?
Odisha teacher 14 days in ditch | కొండచరియలు విరుగడంతో గుంతలో చిక్కుకున్న టీచర్.. 14 రోజుల తర్వాత గుర్తించిన కాపరి
Watch: బైకులతో సింహాన్ని అడ్డుకున్న అటవీ శాఖ సిబ్బంది.. తర్వాత ఏం జరిగిందంటే?
Snowfall | ద్రాస్ సెక్టార్లో మంచు అందాల కనువిందు.. Video

