Black Woman: హెల్ప్ కోసం 911కు కాల్ చేసిన మ‌హిళ.. ఆమెను షూట్ చేసిన అమెరికా పోలీసులు

Black Woman: అమెరికాలో 911కు ఫోన్ చేసి.. పోలీసుల సాయం కోరింది ఓ న‌ల్ల‌జాతి మ‌హిళ‌. ఇంటికి వెళ్లిన పోలీసులు అనూహ్య ప‌రిణామాల నేప‌థ్యంలో ఆమెనే షూట్ చేశారు. ఇంత‌కీ ఏం జ‌రిగిందంటే.

లాస్ ఏంజిల్స్ : అమెరికాకు చెందిన న‌ల్ల జాతి మ‌హిళ‌(Black Woman).. గృహ హింస గురించి ఫిర్యాదు చేసేందుకు 911 ఎమ‌ర్జెన్సీ సేవ‌ల‌కు ఫోన్ చేసింది. అయితే ఆ ఫోన్ కాల్ ద్వారా ఆమె ఇంటికి వ‌చ్చిన పోలీసులు.. అక్క‌డ జ‌రిగిన ప‌రిణామాల నేప‌థ్యంలో.. ఆ మ‌హిళ‌నే షూట్ చేసి చంపారు. డిసెంబ‌ర్ 4వ తేదీన లాస్ ఏంజిల్స్‌లో ఈ ఘ‌ట‌న జ‌రిగింది.

ఈ ఘ‌ట‌న‌కు చెందిన వివ‌రాలు ఇలా ఉన్నాయి. 27 ఏళ్ల నియాని ఫిన్‌లేస‌న్ గృహ హింస గురించి 911 నెంబ‌ర్‌కు ఫోన్ చేసింది. బాయ్‌ఫ్రెండ్ వేధిస్తున్న‌ట్లు ఆమె త‌న ఫోన్ కాల్‌లో ఫిర్యాదు చేసింది. లాంకెస్ట‌ర్‌లోని ఈస్ట్ ఎవ‌న్యూలో ఉన్న అపార్ట్‌మెంట్‌కు పోలీసులు వెళ్లారు. ఆ ఇంట్లో ఉన్న వారు అరుస్తున్న‌ట్లు గుర్తించారు.

డోర్ ఓపెన్ చేసిన పోలీసుల‌కు .. న‌ల్ల‌జాతికి చెందిన నియాని త‌న చేతిలో ఓ భారీ కిచెన్ క‌త్తిని ప‌ట్టుకుని ఉన్న‌ట్లు గుర్తించారు. 9 ఏళ్ల కుమార్తెను తొసివేసినందుకు భాయ్‌ఫ్రెండ్‌ను పొడిచేస్తా అని ఆ మ‌హిళ బెదిరించింది. ఆ స‌మ‌యంలో జ‌రిగిన ఘ‌ర్ష‌ణ‌లో.. పోలీసులు కాల్పులు జ‌రిపారు. కుమార్తె ముందే ఆ మ‌హిళ‌ను పోలీసులు షూట్ చేశారు. హాస్పిట‌ల్‌కు తీసుకువెళ్లినా ఆమె మృతిచెందిన‌ట్లు డాక్ట‌ర్లు చెప్పారు.