Visit:
Turkey Earthquake : టర్కీ (Turkey) లో భారీ భూకంపం సంభవించింది. రిక్టర్‌ స్కేల్‌పై ఈ భూకంప తీవ్రత 6.2 గా నమోదైంది. టర్కీ ప్రధాన నగరం ఇస్తాంబుల్ (Istanbul) లో తీవ్ర ప్రకంపనలు వచ్చాయని ఆ దేశ ఎమర్జెన్సీ మేనేజ్‌మెంట్ ఏజెన్సీ తెలిపింది. ఇస్తాంబుల్‌కు నైరుతి దిశలో 40 కిలోమీటర్ల దూరంలో 10 కిలో మీటర్ల లోతులో భూకంప కేంద్రం నమోదైనట్లు అమెరికా జియోలాజికల్ సర్వే వెల్లడించింది.
ప్రస్తుతానికి ఆస్తి, ప్రాణనష్టం వివరాలు తెలియరాలేదని, ఘటనకు సంబంధించి పూర్తి వివరాలు తెలియాల్సి ఉందని అక్కడి అధికారులు తెలిపారు. ఈ భూకంపం ధాటికి బల్గేరియా, గ్రీస్‌, రొమేనియా దేశాల్లోనూ ప్రకంపనలు కనిపించాయని చెప్పారు. కాగా రెండేళ్ల క్రితం వచ్చిన భూకంపాన్ని మరువకముందే తాజాగా మళ్లీ భూమి కంపించడంతో టర్కీ వాసులు వణికిపోతున్నారు.
2023 ఫిబ్రవరిలో టర్కీలో 7.8 తీవ్రతతో భూకంపం వచ్చింది. దాంతో తీవ్రస్థాయిలో ప్రాణ, ఆస్తి నష్టం సంభవించింది. ఆ విలయంలో వేల మంది ప్రాణాలు కోల్పోయారు. సిరియాలోనూ ప్రకంపనలు రావడంతో 6 వేల మంది చనిపోయారు. ఇక, ఇటీవల మయన్మార్‌, థాయ్‌లాండ్‌లో భారీ భూకంపాలు సంభవించాయి. భారీగా ఆస్తి, ప్రాణ నష్టాలకు దారితీశాయి.
