సియోల్: అణ్వాయుధ దేశమైన ఉత్తర కొరియా నుంచి ముప్పు పొంచి ఉన్న నేపథ్యంలో దక్షిణ కొరియా (South Korea) అప్రమత్తమవుతున్నది. ఎలాంటి పరిస్థితులనైనా ఎదుర్కొనేందుకు అన్నివిధాలుగా సిద్ధమవుతున్నది. ఇందులో భాగంగా కిమ్ కిగ్డమ్ (North Korea) చర్యలపై ఓ కన్నేసి ఉంచేందుకు సైనిక గూఢచార ఉపగ్రహాన్ని (Militar Spy Satellite) రోదసీలోకి పంపించింది.
పూర్తి స్వదేశీ పరిజ్ఞానంతో రూపొందించిన నిఘా ఉపగ్రహాన్ని కాలిఫోర్నియాలోని వాండెన్బర్గ్లో ఉన్న యూఎస్ స్పేస్ ఫోర్స్ బేస్ నుంచి ఎలాన్ మస్క్కు చెందిన స్పేస్ఎక్స్ (SpaceX) ఫాల్కన్ 9 రాకెట్లలో ఒకటి నింగిలోకి ప్రవేశపెట్టింది. స్థానిక కాలమానం ప్రకారం శుక్రవారం ఉదయం 10.19 గంటలకు ఈ ప్రయోగం జరిగింది. కేవలం నాలుగు నిమిషాల వ్యవధిలోనే ఈ ఉపగ్రహాన్ని నిర్దేశిత కక్ష్యలోకి ప్రవేశపెట్టామని దక్షిణ కొరియా రక్షణ శాఖ ప్రకటించింది. 11.37 గంటలకు ఉపగ్రహం నుంచి గ్రౌండ్ స్టేషన్కు సిగ్నల్స్ కూడా అందాయని తెలిపింది. దీంతో ఉత్తర కొరియాపై కన్నేసి ఉంచేందుకు రూపొందించిన తొలి సైనిక నిఘా ఉపగ్రహాన్ని దక్షిణ కొరియా పంపినట్లయింది.
కాగా, గత వారం ఉత్తర కొరియా కూడా సైనిక గూఢచార ఉపగ్రహాన్ని రోదసీలోకి పంపించిన విషయం తెలిసిందే. పూర్తిగా స్వదేశీ పరిజ్ఞానంతో రూపొందించిన గూఢచార ఉపగ్రహాన్ని ప్యాంగాంగ్ గత నెల 28న ప్రయోగించిన విషయం తెలిసిందే. ఈ నేపథ్యంలో తాజాగా దక్షిణ కొరియా కూడా సైనిక ఉపగ్రహాన్ని ప్రయోగించడం విశేషం. 2025 నాటికి మరో నాలుగు గూఢచార ఉపగ్రహాలను పంపించడానికి దక్షిణ కొరియా లక్ష్యంగా పెట్టుకున్నది.