Visit:
Chinese Man : ఓ యువకుడు తన మాజీ ప్రియురాలిని కోర్టుకు ఈడ్చాడు. డేటింగ్ (Dating) లో తనతో కలిసి ఉన్నప్పుడు ఆమె తిండి కోసం పెద్ద మొత్తంలో ఖర్చు చేశానని, ఆ సొమ్మంతా తిరిగిప్పించాలని కోర్టులో దావా వేశాడు. విచారించిన కోర్టు.. రిలేషన్ షిప్లో ఉన్న సమయంలో పెట్టిన ఖర్చు, కొనిచ్చిన వస్తువులతో ఇరువురూ భావోద్వేగ బంధాన్ని కలిగి ఉంటారని, ఆ సొమ్మును తిరిగి ఇవ్వమనడం సరికాదని పేర్కొంది. ఆ యువకుడి పిటిషన్ను కోర్టు కొట్టేసింది. అయితే బ్రైడ్ ప్రైజ్ (Bride prize) కింద యువకుడి తల్లిదండ్రులు ఇచ్చిన సొమ్ములో సగం తిరిగివ్వాలని అతడి మాజీ ప్రియురాలిని కోర్టు (Court) ఆదేశించింది.
వివరాల్లోకి వెళ్తే.. నార్త్ ఈస్టర్న్ చైనాలోగల హిలోంజియాంగ్ రాష్ట్రంలోని ఓ మారుమూల గ్రామానికి చెందిన యువకుడు హె కి, వాంగ్ అనే యువతితో మాట్రిమోని యాప్లో పరిచయం ఏర్పడింది. ఆపై ఇరువురూ కొంతకాలం రిలేషన్షిప్లో ఉన్నారు. ఆ సమయంలో హె తల్లిదండ్రులకు చెందిన హోటల్లో వాంగ్ పనిచేసింది. అప్పుడే హె, వాంగ్ ఎంగేజ్మెంట్ చేసుకున్నారు. ఆ సమయంలో సంప్రదాయం ప్రకారం హె తల్లిదండ్రులు బ్రైడ్ ప్రైస్ కింద 20 వేల యువాన్లు వాంగ్కు ఇచ్చారు.
ఎంగేజ్మెంట్ తర్వాత ఆరు నెలలు కలిసి ఉన్నారు. ఆ తర్వాత వాంగ్ తీరుతో విసిగిపోయిన హె ఆమెతో పెళ్లిని రద్దు చేసుకున్నాడు. వాంగ్కు పనికన్నా తిండిపైనే ఎక్కువ శ్రద్ధ ఉండేదని, తరచూ షాపింగ్ చేస్తూ తన డబ్బుతో దుస్తులు ఇతరత్రా వ్యక్తిగత వస్తువులను కొనుగోలు చేసిందని ఆరోపించాడు. అందుకు 30 వేల యువాన్లు ఖర్చయిందని, బ్రైడ్ ప్రైస్గా ఇచ్చిన 20 వేల యువాన్లు కలిపి మొత్తం 50 వేల యువాన్లు (దాదాపు రూ.6.3 లక్షలు) తిరిగి ఇప్పించాలని కోర్టులో దావా వేశాడు.
అయితే ప్రియురాలి కోసం పెట్టిన ఖర్చు ఇద్దరి భావోద్వేగాలతో ముడిపడి ఉంటుందని, ఆ సొమ్మును తిరిగి ఇవ్వమనడం సరికాదని జడ్జి పేర్కొన్నారు. కేసును కొట్టిస్తూ.. బ్రైడ్ ప్రైజ్ కింద యువకుడి కుటుంబం ఇచ్చిన 20 వేల యువాన్లలో సగం సొమ్ము తిరిగి ఇవ్వాలని వాంగ్ను ఆదేశించారు.
