టోక్యో : రేసింగ్ పోటీలో డ్రింక్స్ కలిసిపోవడంతో పొరపాటున స్కూల్ అథ్లెట్లు హ్యాండ్ శానిటైజర్ తాగిన ఘటన జపాన్లో వెలుగుచూసింది. ఈ ఘటనలో ముగ్గురు అథ్లెట్లు అస్వస్ధతకు లోనై ఆస్పత్రిలో చికిత్స పొందుతున్నారు. శానిటైజర్ తాగిన తర్వాత ఓ అథ్లెట్ కుప్పకూలాడు.
వాంతులు కావడంతో అధికారులు ఆస్పత్రికి తరలించారు. బాలికల 5000 మీటర్ల వాకింగ్ రేస్ గత వారాంతంలో జపాన్లోని యమనషిలో జరగ్గా నిర్వాహకులు అథ్లెట్ల కోసం ఏర్పాటు చేసిన డ్రింక్స్ స్టేషన్లో పొరపాటుగా కప్పుల్లో శానిటైజర్ను నింపారు.
కార్డుబోర్డు బాక్స్లో ఉన్న తాగునీటి బాటిల్స్ పక్కనే ప్లాస్టిక్ బాటిల్లో శానిటైజర్ ఉండటంతో పొరపాటున ఆయా కప్పుల్లో శానిటైజర్ను నింపారని యమనషి హైస్కూల్ స్పోర్ట్స్ ఫెడరేషన్ పేర్కొంది. ఈ ఘటనపై దర్యాప్తునకు ఆదేశించామని యమనషి గవర్నర్ కొటరొ నగషకి వెల్లడించారు. బాధిత అథ్లెట్లు వారి కుటుంబాలకు తాను క్షమాపణలు చెబుతున్నానని చెప్పారు.