మాకు ముందే నోటీస్ ఇచ్చారు.. స‌ర్మాట్ ప‌రీక్ష‌పై అమెరికా

వాషింగ్ట‌న్‌: ఆర్ఎస్-28 స‌ర్మాట్ ఖండాంత‌ర క్షిప‌ణిని ర‌ష్యా ప‌రీక్షించిన విష‌యం తెలిసిందే. దీనిపై అమెరికా ఓ ప్ర‌క‌ట‌న చేసింది. స‌ర్మాట్ ప‌రీక్ష ఓ రొటీన్ టెస్ట్ అని, ఆ క్షిప‌ణితో త‌మ‌కు ఎటువంటి ప్ర‌మాదం లేద‌ని అమెరికా ర‌క్ష‌ణ‌శాఖ పెంట‌గాన్ తెలిపింది. స‌ర్మాట్ క్షిప‌ణి ప‌రీక్ష ఆశ్చ‌ర్య‌క‌రం కాదు అని, ప్ర‌స్తుతం ఆయుధ నియంత్ర‌ణ ఒప్పందాల ప్ర‌కారం త‌మ‌కు ముందే ఆ ప‌రీక్ష గురించి ర‌ష్యా నోటిస్ ఇచ్చింద‌ని పెంట‌గాన్ అధికారులు వెల్ల‌డించారు.

కొత్త ఒప్పందం ప్ర‌కార‌మే ర‌ష్యా ఆ ఐసీబీఎం ప‌రీక్ష చేసిన‌ట్లు పెంట‌గాన్ ప్ర‌తినిధి జాన్ కిర్బీ తెలిపారు. ఆర్ఎస్-28 స‌ర్మాట్ ఐసీబీఎంను ప్లిసెట్కీ మిలిట‌రీ కాస్మోడ్రోమ్ నుంచి ప‌రీక్షించారు. స‌ర్మాట్ ఆయుధం త‌మ సైనిక స‌త్తాను మ‌రింత పెంచుతోంద‌ని ప‌రీక్ష త‌ర్వాత పుతిన్ పేర్కొన్న విష‌యం తెలిసిందే. ప్ర‌స్తుతం అందుబాటులో ఉన్న అత్యాధునిక ర‌క్ష‌ణ వ్య‌వ‌స్థ‌ల‌ను ఈ కొత్త మిస్సైల్ చేధించ‌గ‌ల‌దు.

ప్లిసెట్కీ నుంచి ఎగిరిన ఈ మిస్సైల్‌.. ర‌ష్యా మొత్తం చుట్టి చివ‌ర‌కు తూర్పు తీరం వ‌ద్ద ఉన్న కామ్‌చ‌ట్కా దీవిలో టార్గెట్‌ను ఢీకొట్టింది. అయితే ఈ ఏడాది చివ‌రి వ‌ర‌కు స‌ర్మాట్ ట్ర‌య‌ల్స్ పూర్తి అవుతాయ‌ని, ఆ త‌ర్వాత అధికారికంగా క్షిప‌ణి ద‌ళంలోకి చేరుతుంద‌న్నారు. ఆర్‌-36 వోయివోడా ఐసీబీఎంతో పాటు స‌ర్మాట్‌కు హైప‌ర్‌సోనిక్ గ్లైడ‌ర్ వార్‌హెడ్స్‌ను ఫిక్స్ చేయ‌వ‌చ్చు అని ర‌ష్యా ర‌క్ష‌ణ శాఖ చెప్పింది.

‘సర్మాట్‌’ విశేషాలు
ప్రపంచంలో అత్యంత శక్తిమంతమైన దీర్ఘశ్రేణి బాలిస్టిక్‌ క్షిపణి.
ప్రపంచంలో ఏ మూలన ఉన్న లక్ష్యాన్నైనా ధ్వంసం చేయగలదు.
ఈ క్షిపణిని అభివృద్ధి చేయడానికే 20 ఏండ్ల సమయం పట్టింది.
అణ్వాయుధాలను మోసుకెళ్లగలదు. 10 వార్‌హెడ్లనూ తీసుకెళ్తుంది.
భిన్న టార్గెట్లను నాశనం చేసే 200 టన్నుల వార్‌హెడ్లనూ మోయగలదు.
క్షిపణి నాశక వ్యవస్థ, శత్రు నిఘా వ్యవస్థ నుంచి తప్పించుకోగలదు.