Abdulla Shahid: చిన్నారిపై లైంగిక వేధింపులు.. మాల్దీవులు మాజీ విదేశాంగ మంత్రి అరెస్టు

Abdulla Shahid: మాల్దీవుల మాజీ విదేశాంగ మంత్రి అబ్దుల్లా షాహిద్‌ను పోలీసులు అరెస్టు చేశారు. చిన్నారిని లైంగికంగా వేధించిన‌ట్లు ఆయ‌న‌పై ఆరోప‌ణ‌లు ఉన్నాయి. కోర్టు వారెంట్ ప్ర‌కారం రాత్రి 9.59 నిమిషాల‌కు మాజీ మంత్రి అబ్దుల్లాను అరెస్టు చేసిన‌ట్లు పోలీసులు తెలిపారు.

మాలే: మాల్దీవుల మాజీ విదేశాంగ మంత్రి అబ్దుల్లా షాహిద్‌(Abdulla Shahid)ను పోలీసులు అరెస్టు చేశారు. చిన్న‌పిల్ల‌ల‌ను లైంగికంగా వేధించిన‌ట్లు ఆయ‌న‌పై ఆరోప‌ణ‌లు ఉన్నాయి. మాల్దీవు పోలీసులు సోమ‌వారం దీనిపై ఓ ప్ర‌క‌ట‌న రిలీజ్ చేశారు. కోర్టు వారెంట్ ప్ర‌కారం రాత్రి 9.59 నిమిషాల‌కు మాజీ మంత్రి అబ్దుల్లాను అరెస్టు చేసిన‌ట్లు చెప్పారు. గ‌తంలో ఐక్య‌రాజ్య‌స‌మితి జ‌న‌ర‌ల్ అసెంబ్లీ ప్రెసిడెంట్‌గా చేశారాయ‌న‌. వాస్త‌వానికి 2028లో జ‌ర‌గ‌బోయే దేశాధ్య‌క్ష ఎన్నిక‌ల్లో ఆయ‌న మాల్దీవియ‌న్ డెమోక్ర‌టిక్ పార్టీ త‌ర‌పున అధ్య‌క్ష ప‌ద‌వి కోసం నామినేష‌న్ వేయాల్సి ఉన్న‌ది. 64 ఏళ్ల అబ్ధుల్లా 18 లోపు ఉన్న చిన్నారిని లైంగికంగా వేధించిన‌ట్లు అనుమానాలు ఉన్నాయ‌ని, న‌వంబ‌ర్ 2వ తేదీన కోర్టు వారెంట్ ఆధారంగా ఆయ‌న్ను అదుపులోకి తీసుకున్నామ‌ని, ఈ కేసులో పోలీసులు మ‌రింత ద‌ర్యాప్తు చేస్తున్నార‌ని అధికారులు పేర్కొన్నారు. అయితే త‌న‌పై వ‌చ్చిన ఆరోప‌ణ‌ల‌ను షాహిద్ కొట్టిపారేశారు. నిరాధార‌మైన ఆరోప‌ణ‌లు చేస్తున్నార‌న్నారు. త‌న గురించి చెడుగా ప్ర‌చారం చేయ‌రాదు అని ఆయ‌న కోరారు.

మాల్దీవుల్లో ఉన్న రాజ‌కీయ‌వేత్త‌ల్లో షాహిద్‌కు అంత‌ర్జాతీయంగా మంచి గుర్తింపు ఉన్న‌ది. 2018 నుంచి 2023 వ‌ర‌కు ఆయ‌న ఆ దేశ విదేశాంగ మంత్రిగా చేశారు. ఆ స‌మ‌యంలో దేశాధ్య‌క్షుడిగా ఇబ్ర‌హీం మొహ‌మ్మ‌ద్ సోలి ఉన్నారు. 2021-22 మ‌ధ్య కాలంలో యూఎన్ జ‌న‌ర‌ల్ అసెంబ్లీలో అధ్య‌క్షుడిగా చేశారు. పీపుల్స్ మ‌జ్లీస్ స్పీక‌ర్‌గా చేశారు. 2024 ఫిబ్ర‌వ‌రి నుంచి ఆగ‌స్టు 2026 వ‌ర‌కు మాల్దీవుల డెమోక్ర‌టిక్ పార్టీకి నాయ‌క‌త్వం వ‌హించారు. గ‌త‌నెల‌లోనే ఢిల్లీలో జ‌రిగిన లిట‌రేచ‌ర్ స‌ద‌స్సుకు షాహిద్ హాజ‌ర‌య్యారు.స్పేసెస్ వీ కాల్ హోమ్‌.. డ‌యాస్పోరా అండ్ బిలాంగింగ్ అన్న అంశంపై ఆయ‌న మాట్లాడారు.