Antarctica: అంటార్కిటికాలో భ‌య‌పెడుతున్న భారీ మంచు కొండ‌

ఓ భారీ మంచు కొండ ఇప్పుడు భ‌య‌పెడుతోంది. అంటార్కిటికా( Antarctica )లోని వెడెల్ స‌ముద్రంలో తేలియాడుతున్న ఈ ఐస్‌బర్గ్.. ప‌క్క‌నే ఉన్న బ్రంట్ ఐస్ షెల్ఫ్‌ను ఢీకొట్టేలా క‌నిపిస్తోంది.

లండ‌న్‌: ఓ భారీ మంచు కొండ ఇప్పుడు భ‌య‌పెడుతోంది. అంటార్కిటికా( Antarctica )లోని వెడెల్ స‌ముద్రంలో తేలియాడుతున్న ఈ ఐస్‌బర్గ్.. ప‌క్క‌నే ఉన్న బ్రంట్ ఐస్ షెల్ఫ్‌ను ఢీకొట్టేలా క‌నిపిస్తోంది. ఎ-74గా పిలుస్తున్న ఈ మంచు కొండ‌.. మ‌న ఢిల్లీ అంత పెద్దది కావ‌డం విశేషం. ఈ ఏడాది మొద‌ట్లో ఇదే బ్రంట్ ఐస్ షెల్ఫ్ నుంచి ఈ ఎ-74 విడిపోయింది. దానికి మ‌రీ స‌మీపంలో ఉన్న‌ట్లుగా యురోపియ‌న్ స్పేస్ ఏజెన్సీ (ఈఎస్ఏ) త‌న రాడార్ ఫొటోల ద్వారా గుర్తించింది.

ఈ మంచు కొండ సైజు 1270 చ‌ద‌ర‌పు కిలోమీట‌ర్లు. ఇంత భారీ కొండ స‌ముద్ర జ‌లాల ప్ర‌వాహం కార‌ణంగా క‌దులుతూ వ‌చ్చి బ‌లంగా బ్రంట్ ఐస్ షెల్ఫ్‌ను ఢీకొంటే.. ఆ ధాటికి మ‌రో 1700 చ‌ద‌ర‌పు కిలోమీట‌ర్ల సైజులో ఉండే మ‌రో మంచు కొండ విడిపోతుంద‌ని భావిస్తున్నారు. ఈ ఏడాది ఫిబ్ర‌వ‌రి 26న అంటార్కిటికాలోని ఉత్త‌ర భాగంలో ఉన్న బ్రంట్ ఐస్ షెల్ఫ్ నుంచి ఈ ఎ-74 విడిపోయింది. గ‌త కొన్నేళ్లుగా 150 మీట‌ర్ల మందంగా ఉండే ఈ ఐస్ షెల్ఫ్‌లో భారీగా ప‌గుళ్లు ఏర్ప‌డిన‌ట్లు గ్లేసియాల‌జిస్టులు చెప్పారు.