5D memory crystals | మానవాళి అంతర్థానం కాకుండా..! 5డీ క్రిస్టల్‌లో మనిషి జన్యువు చేర్పు

5D memory crystals | భూమిపై మానవాళి అంతరించిపోతే? దీనికి సమాధానంగా బ్రిటన్‌లోని సౌతాంప్టన్‌ యూనివర్సిటీకి చెందిన శాస్త్రవేత్తల బృందం.. సైన్స్‌ ఫిక్షన్‌ను తలపించే ఆవిష్కరణ చేశారు. మనిషి జన్యువులను ఒక ‘5డీ మెమరీ క్రిస్టల్‌'లో భద్రంగా దాచిపెట్టారు.

• సుమారు 13.8 బిలియన్‌ ఏండ్లు చెక్కుచెదరకుండా జీనోమ్‌ డాటా
• సౌతాంప్టన్‌ యూనివర్సిటీ శాస్త్రవేత్తల బృందం అద్భుతం

లండన్‌, సెప్టెంబర్‌ 19: భూమిపై మానవాళి అంతరించిపోతే? దీనికి సమాధానంగా బ్రిటన్‌లోని సౌతాంప్టన్‌ యూనివర్సిటీకి చెందిన శాస్త్రవేత్తల బృందం.. సైన్స్‌ ఫిక్షన్‌ను తలపించే ఆవిష్కరణ చేశారు. మనిషి జన్యువులను ఒక ‘5డీ మెమరీ క్రిస్టల్‌’లో భద్రంగా దాచిపెట్టారు.

అంతరించే జాతిని తిరిగి రప్పించాలన్న సంకల్పంతో.. ఆస్ట్రియాలోని హాల్‌స్టాట్‌లో ఉన్న ఓ గుహలో భద్రంగా ఉంచారు. 360 టెరాబైట్ల మెమరీ కలిగిన ఆ క్రిస్టల్‌ ఎంత పటిష్టం అంటే.. 1000 డిగ్రీల సెల్సియస్‌ ఉష్ణోగ్రతను, గడ్డకట్టే చలిని సైతం తట్టుకుంటుంది.

13.8 బిలియన్‌ సంవత్సరాల వరకు డాటా భద్రంగా ఉంటుంది. ఒకవిధంగా చెప్పాలంటే ఆ క్రిస్టల్‌ క్వార్ట్‌లా అత్యంత గట్టిదనం కలిగినది. ఈ 5డీ క్రిస్టల్‌లో జన్యువును దాచేందుకు అల్ట్రా ఫాస్ట్‌ లేజర్లను ఉపయోగించారు. శాస్త్రవేత్తల ఘనతకుగానూ గిన్నిస్‌ బుక్‌లో చోటు కూడా దక్కింది.

5డీ మెమరీ క్రిస్టల్‌ విశేషాలివీ..

• తొలి 5డీ మెమరీ క్రిస్టల్‌ను 2014 జనవరి 23న యూనివర్సిటీ ఆఫ్‌ సౌతాంప్టన్‌ శాస్త్రవేత్తలు తయారుచేశారు.
• గది ఉష్ణోగ్రత వద్ద 300 క్వింట్రిలియన్‌ సంవత్సరాల వరకు చెక్కు చెదరకుండా ఉంటుంది.
• సాధారణంగా దీని జీవిత కాలం 13.8 బిలియన్‌ సంవత్సరాలు (అంటే.. ప్రస్తుతం మన విశ్వం వయసు అన్నమాట).