Hug | ఆమెను కౌగిలించుకున్నందుకు.. రూ.లక్ష నష్టపరిహారం ఇవ్వాలన్న కోర్టు.. కారణం ఏంటంటే?

ఒకే కంపెనీలో ఉద్యోగం చేసే సమయంలో సంతోషాలు పంచుకునేందుకు కొలీగ్స్ కౌగిలించుకోవడం, హైఫైలు ఇచ్చుకోవడం సహజమే. అయితే ఇలా చేసిన ఒక వ్యక్తికి రూ.1.16 లక్షల ఫైన్ వేసిందో కోర్టు. దీనికి బలమైన కారణం ఉందండోయ్. ఈ ఘటన చైనాలోని యూయాంగ్ సిటీలో వెలుగు చూసింది. ఇక్కడ ఒక కంపెనీలో పనిచేసే మహిళ.. తన కొలీగ్‌తో ఏదో విషయంలో మాట్లాడుతోంది.

ఆ సమయంలో వెనక నుంచి వచ్చిన ఒక మగ కొలీగ్.. ఆమెను చాలా బలంగా వెనుక నుంచి కౌగిలించుకున్నాడు. అతను ఎంత గట్టిగా కౌగిలించుకున్నాడంటే సదరు మహిళ నొప్పితో పెద్దగా అరిచింది. అతని పట్టు నుంచి తప్పించుకున్న తర్వాత కూడా ఛాతీ భాగంలో నొప్పిగానే అనిపించిందామెకు. ఇంటికి వెళ్లిన తర్వాత వేడి నూనెతో మర్దన చేసుకుంది. అయినా నొప్పి తగ్గలేదు.

అదే తగ్గుతుందిలే అని వదిలేసింది. ఇలా ఐదు రోజులు గడిచినా కూడా నొప్పి ఏమాత్రం తగ్గలేదు. దాంతో ఆస్పత్రికి వెళ్లగా.. ఎక్స్‌రేలో ఆమె ఛాతీ భాగంలో మూడు పక్కటెముకలు విరిగినట్లు తేలింది. కుడివైపు రెండు, ఎడమవైపు రెండు రిబ్స్ విరిగాయని వైద్యులు తెలిపారు. దాంతో ఆమె ఆఫీసుకు రాలేక సెలవు పెట్టింది. ఈ సమయంలో జీతం కూడా అందలేదు.

దానికితోడు ఆస్పత్రి ఖర్చులు కూడా నెత్తినపడ్డాయి. ఈ నేపథ్యంలో తన గాయానికి కారణమైన కొలీగ్‌ను కలిసిన ఆమె.. తనకు అతని వల్లనే గాయమైందని, కాబట్టి ఆస్పత్రి ఖర్చులు కట్టాలని కోరింది. దానికి అతను నిరాకరించాడు. తన కౌగిలి వల్లనే ఎముకలు విరిగినట్లు సాక్ష్యం ఏంటన్నాడు.

అతన్ని ఒప్పించలేకపోయిన మహిళ యూంషీ కోర్టులో పిటిషన్ వేసింది. దీనిపై విచారణ జరిపిన న్యాయస్థానం.. ఆఫీసు ఘటన తర్వాత ఆ యువతి ఎముకలు విరిగేంతటి పని ఏదీ చేసినట్లు కనిపించడం లేదని తెలిపింది. దీంతో ఆమెకు 10 వేల యువాన్లు (సుమారు రూ.1.16 లక్షలు) చెల్లించాలని గట్టిగా కౌగిలించుకున్న కొలీగ్‌ను ఆదేశించింది.