హెచ్‌-1బీలను రెట్టింపు చేయాలి

• గ్రీన్‌కార్డు కోటాలను తొలగించాలి
• ప్రభుత్వానికి అమెరికా చాంబర్‌ఆఫ్‌ కామర్స్‌ డిమాండ్లు
• ‘అమెరికా వర్క్‌’ పేరుతో ప్రచారోద్యమం

వాషింగ్టన్‌ : అమెరికాలో పని చేయటానికి ఉపయోగపడే హెచ్‌-1బీ వీసాలను ఇప్పుడిస్తున్నదానికంటే రెట్టింపు చేయాలనే డిమాండ్‌ స్వయంగా అమెరికాలోనే ఊపందుకుంటున్నది. శక్తివంతమైన ఆ దేశ చాంబర్‌ ఆఫ్‌ కామర్స్‌ ఈ మేరకు ‘అమెరికా వర్క్స్‌’ పేరుతో భారీ ఎత్తున ప్రచారాన్ని ఇటీవల ప్రారంభించింది. అమెరికాలో నిపుణుల కొరత తీవ్రంగా ఉన్న నేపథ్యంలో.. హెచ్‌-1బీ వీసాలను రెట్టింపు చేయాలని, అమెరికా పౌరసత్వానికి చిహ్నమైన గ్రీన్‌కార్డుల జారీలో ప్రస్తుతం దేశాలవారీగా విధిస్తున్న కోటాలను పూర్తిగా తొలగించాలని ఆ సంస్థ డిమాండ్‌ చేస్తున్నది. ఈ మేరకు బైడెన్‌ యంత్రాంగానికి, కాంగ్రెస్‌కు విజ్ఞాపనలు చేసింది. అమెరికా చాంబర్‌ ఆఫ్‌ కామర్స్‌ చేస్తున్న డిమాండ్లు ఇలా ఉన్నాయి..

• ఉద్యోగ వీసాలను (హెచ్‌-1బీ, హెచ్‌-2బీ) ప్రస్తుతం ఏటా 1,40,000 మంజూరు చేస్తున్నారు. దీనిని 2.8లక్షలకు పెంచాలి.
• ఏటా ఇచ్చే గ్రీన్‌కార్డు కోటాలో ఉద్యోగి భార్య/ భర్తను, మైనర్‌ పిల్లలనూ లెక్కించే పద్ధతిని విడనాడాలి. దీంతో అమెరికాలో పని చేయటానికి అవకాశం లభించే వారి సంఖ్య రెట్టింపవుతుంది.
• దేశాలవారీ కోటా పద్ధతిని తొలగించాలి.
• అమెరికా యూనివర్సిటీల్లో విద్యాభ్యాసం చేసి డిగ్రీలు తీసుకున్న విదేశీ విద్యార్థులకు ఎంప్లాయిమెంట్‌ బేస్డ్‌ గ్రీన్‌కార్డుల జారీలో మరిన్ని అవకాశాలు కల్పించాలి. ఔత్సాహిక పారిశ్రామికవేత్తలకు శాశ్వత నివాసం కల్పించాలి.
• ప్రపంచవ్యాప్తంగా అమెరికా రాయబార కార్యాలయాల్లో వీసా ప్రాసెసింగ్‌ను నిరంతరప్రక్రియగా తిరిగి చేపట్టాలి.
• తగినంత జనాభా లేకపోవటం వల్ల తీవ్రమైన ఆర్థిక, సామాజిక సమస్యలను ఎదుర్కొంటున్న అమెరికా వర్గాల్లో జనసంఖ్యను, ఆర్థికాభివృద్ధిని పెంచే లక్ష్యంతో వీసా కార్యక్రమాలను చేపట్టాలి.