Visit:
Gun Fire | అగ్రరాజ్యం అమెరికాలో తుపాకుల మోత కొనసాగుతూనే ఉంది. తాజాగా మరోసారి అక్కడ తూటాలు పేలాయి. ఫ్లోరిడాలో జరిగిన కాల్పుల్లో కనీసం 10 మంది గాయపడ్డారు. ఈ విషయాన్ని లేక్‌ల్యాండ్ పోలీసు విభాగం నిర్ధారించింది. సోమవారం మధ్యాహ్నం ఈ కాల్పుల ఘటన చోటుచేసుకున్నట్లు పోలీసులు తెలిపారు. 10 మంది గాయపడ్డారని, వీరిలో ఇద్దరి పరిస్థితి విషమంగా ఉన్నట్టు చెప్పారు.
డార్క్ బ్లూ కలర్ నిస్సాన్ కారులో వచ్చిన నలుగురు దుండగులు కిటికీ అద్దాలను దించి వాహనాన్ని నెమ్మదిగా పోనిస్తూ కాల్పులకు పాల్పడినట్టు పోలీసులు తెలిపారు. కారులో నుంచే వారు కాల్పులకు పాల్పడినట్లు చెప్పారు. గాయపడిన వారిలో ముగ్గురిని మాత్రమే అత్యవసర చికిత్సకు తరలించినట్టు తెలిపారు. దుండగుల కోసం గాలిస్తున్నట్టు పోలీసులు పేర్కొన్నారు.
కాగా, గతవారం లాస్ ఏంజెల్స్‌ సమీపంలోని మాంటెరీ పార్కు నగరంలో చైనీస్ న్యూ ఇయర్ వేడుకలపై జరిగిన కాల్పుల్లో 10 మంది ప్రాణాలు కోల్పోగా, మరో 10 మంది గాయపడ్డారు. ఆ తర్వాత కూడా పలు ప్రాంతాల్లో కాల్పులు జరిగాయి.
