ఇస్లామాబాద్: ప్రపంచంలోని అతి తక్కువ నివాసయోగ్యమైన నగరంగా పాకిస్థాన్కు (Pakistan) చెందిన కరాచీ (Karachi) నిలిచింది. ప్రపంచవ్యాప్తంగా 173 నగరాల్లో 169వ స్థానంలో ఉంది. లాగోస్, అల్జీర్స్, ట్రిపోలీ, డమాస్కస్ నగరాలు మాత్రమే కరాచీ కంటే తక్కువ స్థానంలో ఉన్నాయి. 2023కుగాను లండన్కి చెందిన ఎకనామిస్ట్ ఇంటెలిజెన్స్ యూనిట్ (EIU) గ్లోబల్ లివబులిటీ ఇండెక్స్ (Global Livability Index) జాబితాను విడుదల చేసింది.
కోవిడ్-19 మహమ్మారి తర్వాత (Post-COVID recovery) సాధారణ స్థితిని పునరుద్ధరించడానికి చేసిన ప్రయత్నాల ఆధారంగా చేసుకుని సుస్థిరత, ఆరోగ్య సంరక్షణ, సంస్కృతి, పర్యావరణం, విద్య, మౌలిక సదుపాయాలను పరిగణనలోకి తీసుకొని జీవన పరిస్థితులను లెక్కిస్తుంది. ప్రపంచవ్యాప్తంగా 173 నగరాల్లో ఒక వ్యక్తి జీవనశైలికి ఎదురయ్యే సవాళ్లను ఈ సూచిక లెక్కించింది. నివాస యోగ్యతను అంచనా వేయడానికి 1-100 రేటింగ్స్ను నిర్ణయిస్తుంది. ఇక్కడ 1 పాయింట్ వస్తే భరించలేనిదిగా, 100 రేటింగ్ వస్తే దానిని ఆదర్శ మైనదిగా పరిగణిస్తుంది.అయితే ఈ ఐదు అంశాల్లో కరాచీ 42.5 స్కోర్ను మాత్రమే సాధించింది. ఇందులో స్థిరత్వ సూచికలో 20 పాయింట్లు, ఆరోగ్య సంరక్షణలో 50, సంస్కృతి, పర్యావరణంలో 38.7, విద్యలో 75, మౌలిక సదుపాయాల్లో 51.8 స్కోర్ చేసింది. ఇది ఆదర్శం కంటే తక్కువ కావడంతో అతి తక్కువ నివాసయోగ్యమైన నగరాల్లో ఐదో స్థానాన్ని కేటాయించింది. కాగా, 2019 నుంచి గ్లోబల్ లివబులిటీ ఇండెక్స్లో కరాచీ స్థానం అంత మెరుగ్గా ఏమీలేదు. 2019లో మొత్తం 140 నగరాల్లో 136వ స్థానంలో ఉండగా, 2022లో 140 ప్లేస్ ఉన్నది. 2020లో జాబితాను వెలువరించలేదు.