Meta Layoffs | మరింతమంది ఉద్యోగులను తొలగించనున్న మెటా!

ఫేస్‌బుక్‌ (Facebook) మాతృసంస్థ మెటా (Meta) ప్లాట్‌ఫామ్స్‌ మరోసారి ఉద్యోగులకు షాక్‌ ఇవ్వనుంది. రానున్న నెలల్లో విడుతలవారీగా భారీ సంఖ్యలో ఉద్యోగులను తొలగించేందుకు (Layoffs) రంగం సిద్ధం చేసింది.

Meta Layoffs | ఫేస్‌బుక్‌ (Facebook) మాతృసంస్థ మెటా (Meta) ప్లాట్‌ఫామ్స్‌ మరోసారి ఉద్యోగులకు షాక్‌ ఇవ్వనుంది. రానున్న నెలల్లో విడుతలవారీగా భారీ సంఖ్యలో ఉద్యోగులను తొలగించేందుకు (Layoffs) రంగం సిద్ధం చేసింది. గతేడాది నుంచి తొలగించిన 13 శాతానికి ఇది అటూఇటుగా ఉండనుందని వాల్‌ స్ట్రీట్‌ జర్నల్‌ (Wall Street Journal) నివేదిక వెల్లడించింది. ఉద్యోగులపై వేటు (Jobs Cut) వచ్చే వారం ప్రారంభమవుతుందని, ఇది నెలల పాటు విడుతల వారీగా కొనసాగుతుందని పేర్కొన్నది. ఈసారి అత్యధికంగా నాన్‌ ఇంజినీరింగ్‌ విధుల్లో (Non-engineering roles) పనిచేస్తున్నవారిపై ప్రభావం ఉండనుందని తెలిపింది. దీంతోపాటు కొన్ని ప్రాజెక్టులను మూసివేయనుందని, అత్యవసరం కానీ టీమ్‍లను పూర్తిగా తొలగించనుందని వివరించింది. అయితే ఈ నివేదికలపై ఇప్పటివరకు మెటా ఎలాంటి ప్రకటన చేయలేదు.

మెటా కంపెనీ గత ఏడాది నవంబర్‌లో 11 వేల మందికి పైగా ఉద్యోగులను తొలగించింది. ఇప్పటివరకు ఓ టెక్‌కంపెనీ ఇంత పెద్దసంఖ్యలో ఉద్యోగులను తొలగించడం ఇదే మొదటిసారి. కాగా, ప్రకటనల ఆదాయం తగ్గడంతో ఆర్థిక లక్ష్యాలను మెటా చేరుకోలేకపోయింది. దీంతో మరోసారి ఉద్యోగుల తొలగింపునకు సిద్ధమైందని వాల్‌ స్ట్రీట్‌ నివేదించింది.

ఆదాయం తగ్గడం, ఆర్థిక అనిశ్చితి, ఆర్థిక మాంద్యం భయాలతో మెటాతోపాటు మైక్రోసాఫ్ట్, గూగుల్, అమెజాన్, ఐబీఎం, హెచ్‍పీ సహా మరిన్ని దిగ్గజ సంస్థలు వేలాది మంది ఉద్యోగులను తీసేశాయి. వందలాది సంస్థలు ఉద్యోగాలను లేఆఫ్స్ చేశాయి. ఇప్పుడు ప్రపంచవ్యాప్తంగా ఇదే ట్రెండ్‌ నడుస్తున్నది. ముఖ్యంగా టెక్ కంపెనీలు ఎక్కువగా ఉద్యోగులను తీసేస్తున్నాయి.