Vaccines | బోస్టన్, మే 3: కొవిడ్ కారణంగా వ్యాక్సిన్ల వినియోగం ఎంతగానో పెరిగింది. ప్రపంచవ్యాప్తంగా వివిధ కంపెనీలు, పరిశోధకులు వ్యాక్సిన్లపై అధ్యయనాలు చేస్తున్నారు. వీటి ఉత్పత్తి ఒకెత్తయితే, రవాణా, నిల్వ మరోఎత్తు. చాలా వ్యాక్సిన్లను శీతల గిడ్డంగుల్లోనే భద్రపరచాల్సి ఉంటుంది. ఉష్ణోగ్రతల్లో తేడాలొస్తే వ్యాక్సిన్లు వ్యాధులపై ప్రభావాన్ని చూపించవు. వీటిని నిల్వ చేసేందుకు ల్యాబ్లు, వసతులు అవసరం. ఇది ఖర్చుతో కూడుకున్న వ్యవహారం. భారత్లో అధిక జనాభా, ఉష్ణోగ్రతలు వ్యాక్సిన్ల రవాణా, నిల్వకు సవాలుగా మారుతున్నాయి. ఇకపై ఈ కష్టాలు తీరనున్నాయి. అమెరికాకు చెందిన మసాచుసెట్స్ ఇన్స్టిట్యూట్ ఆఫ్ టెక్నాలజీ (ఎంఐటీ) వైద్యరంగంలో అద్భుతాన్ని ఆవిష్కరించింది. మారుమూల ప్రాంతాలు, రిమోట్ ఏరియాలకు వ్యాక్సిన్లను అందించేందుకు పడుతున్న కష్టాలు తొలగించేలా మొబైల్ వ్యాక్సిన్ ప్రింటర్ను ఆవిష్కరించింది.
అధ్యయన ఫలితాలు నేచర్ బయో టెక్నాలజీ జర్నల్లో ప్రచురితమయ్యాయి. ఈ ప్రింటర్ను ఒక బల్లపై పెట్టుకొని కూడా వ్యాక్సిన్లను ఉత్పత్తి చేయవచ్చు. ఈ ప్రింటర్తో ఒక్కరోజులో వందల వ్యాక్సిన్ డోసులను ఉత్పత్తి చేయవచ్చు. పరిమాణంలో చిన్నదైన దీన్ని ఏ ప్రాంతంలో వ్యాక్సిన్ కావాలో అక్కడికి సులభంగా తీసుకెళ్లగలగటం మరో విశేషం. ఎబోలా, కొవిడ్ లాంటి మహమ్మారి బారిన పడ్డ ప్రాంతాలకు తీసుకెళ్లి వ్యాక్సిన్లను ఉత్పత్తి చేసి బాధితులకు అందించవచ్చు.
మొబైల్ వ్యాక్సిన్ ప్రింటర్ ద్వారా ఉత్పత్తి చేసిన మైక్రోనీడిల్ ప్యాచ్లలో వ్యాక్సిన్లు ఉంటాయి. ఈ ప్యాచ్లను చర్మానికి అతికిస్తారు. ఈ ప్యాచ్లను చర్మం ఉపరితలం కింద కరిగిపోయే వందలాది మైక్రోనీడిల్స్తో రూపొందించారు. దీంతో సాధారణ ఇంజెక్షన్ అవసరం లేకుండానే వ్యాక్సిన్ను మానవ శరీరంలోకి పంపించవచ్చు. టీకా కలిగిన మైక్రోనీడిల్ను ప్రింట్ చేసే ఇంక్లో లిపిడ్ నానో పరిమాణంలో ఆర్ఎన్ఏ వ్యాక్సిన్ అణువులు ఉన్నాయి. దీని వల్ల వ్యాక్సిన్లు చాలాకాలం పాటు స్థిరంగా నిల్వ ఉంటాయి. అదేవిధంగా ఈ ఇంక్లో పాలిమర్స్ కూడా ఉంటాయి. పాలిమర్ల వల్ల వ్యాక్సిన్ కావాల్సిన పరిణామంలోకి మారుతుంది. పాలివినైల్క్లోరైడ్, పాలివినైల్ ఆల్కహాల్లను 50:50 పద్ధతిలో కలిపి మైక్రోనీడిల్ను రూపొందించారు. ప్రింటర్లో ఉండే రోబోటిక్ సాధనం ఇంక్ను మైక్రోనీడిల్లోకి పంపిస్తుంది. కింద ఉన్న వ్యాక్యూమ్ చాంబర్ సిరాను నీడిల్ చివరి అంచుల వరకు చేరేలా చేస్తుంది. సిరా చివరి వరకు చేరి వ్యాక్సిన్ ఒక రూపానికి వచ్చిన తర్వాత రెండు రోజుల పాటు ఆరేందుకు సమయం పడుతుంది.
శీతల గిడ్డంగులు లేకున్నా సాధారణ గది ఉష్ణోగ్రతలోనే నెలల పాటు వీటిని భద్రపరచవచ్చు. కొవిడ్కు ముందు పరిశోధనలు మొదలయ్యాయి. ఎబోలా లాంటి మహమ్మారి సోకినప్పుడు త్వరితగతిన వ్యాక్సిన్లను ఉత్పతి చేసి ఆయా ప్రాంతాలకు అందించేలా పరిశోధనలు చేశారు. అతిచిన్నగా, సులభంగా రవాణా చేసేలా, రిమోట్ ఏరియాలు, మిలటరీ క్యాంపులకు సైతం చేరవేసేలా పరిశోధనలు చేశారు.
ఆర్నెల్లు 4-25 డిగ్రీల ఉష్ణోగ్రత వద్ద నిల్వ ఉంచి పరీక్షించారు. ఒక బ్యాచ్ వ్యాక్సిన్లను 37 డిగ్రీల సెల్సియస్ వద్ద నిల్వ ఉంచారు. తర్వాత ఎలుకలపై పరీక్షించగా, సమర్థంగా పనిచేస్తున్నట్టు గుర్తించారు. నాలుగు వారాల వ్యవధిలో ఉత్పత్తి చేసిన కొవిడ్-19 వ్యాక్సిన్ను ఎలుకలపై పరీక్షించారు. తర్వాత సంప్రదాయ వ్యాక్సిన్ను పరీక్షించగా ఒకే ఫలితాలు వచ్చాయి. 3 నెలలపాటు గది ఉష్ణోగ్రత వద్ద నిల్వ చేసిన వ్యాక్సిన్ వేశాక ఎలుకలో యాంటి బాడీలు సమృద్ధిగా ఉన్నట్టు గుర్తించారు.