China | పిల్లలు కనాలనుకునే జంటలకు చైనా బంపరాఫర్.. కొత్త రూల్ తెచ్చిన డ్రాగన్ కంట్రీ

పిల్లలు కనాలనుకునే జంటలకు చైనా ప్రభుత్వం బంపరాఫర్ ప్రకటించింది. ఆర్థిక పరిమితుల కారణంగా పిల్లలు కనకుండా ఉండేవారికి శుభవార్త చెప్పింది. వీరికోసం అసిస్టెడ్ రిప్రొడక్టివ్ టెక్నాలజీస్ (ఏఆర్‌టీ) ఉపయోగించే 16 రకాల మెడికల్ సేవలకు ఇన్సూరెన్స్ కల్పిస్తున్నట్లు తెలిపింది. ఈ సేవలు మార్చి 26 నుంచి చైనా రాజధాని బీజింగ్‌లో అమల్లోకి రానున్నాయి.

ఇప్పటికే చైనాలో జననాల రేటు రికార్డు స్థాయిలో తగ్గిపోయింది. గతేడాది ఈ రేటు చరిత్రలో లేనంతగా తగ్గింది. దీంతో అప్రమత్తమైన ప్రభుత్వం దేశంలో జననాల రేటును పెంచేందుకు చర్యలు తీసుకోవాలని నిర్ణయించుకుంది. ఈ విషయంలో సానుకూల ఫలితాలు సాధించడం కోసం అవసరమైన చర్యలన్నీ తీసుకొంటామని చైనా ప్రీమియర్ లి కెకియాంగ్ చెప్పారు.

డ్రాగన్ దేశంలో వృద్ధుల సంఖ్య పెరుగుతూ.. పని చేసే వర్క్‌ఫోర్స్ తగ్గిపోతోందని, ఒక విధంగా ‘డెమొగ్రాఫిక్ టైమ్‌బాంబ్’ ఎదుర్కొంటోందని నిపుణులు హెచ్చరికలు చేశారు. ఈ క్రమంలోనే జననాల సంఖ్యను పెంచేందుకు బీజింగ్ ప్రభుత్వం ఇన్సూరెన్సును ప్రకటించింది. గర్భధారణ సమయంలో అయ్యే ఖర్చులకు భయపడే తక్కువ జీతం ఉన్న కుటుంబాలు ఈ నిర్ణయం వల్ల లబ్ది పొందుతాయని ప్రభుత్వం భావిస్తోంది. తద్వారా జననాల రేటు పెరుగుతుందని ఆశిస్తోంది.