మాస్కో: రష్యాలోని గన్ పౌడర్ ఫ్యాక్టరీలో శుక్రవారం పేలుడు జరిగింది. ఈ ఘటనలో 16 మంది మరణించినట్లు ఆ దేశ అధికారులు తెలిపారు. మాస్కోకు ఆగ్నేయంగా 270 కిలోమీటర్ల దూరంలోని రియాజాన్ ప్రాంతంలో ఉన్న ఎలాస్టిక్ ఫ్యాక్టరీలో శుక్రవారం పేలుడు జరిగినట్లు రష్యా అత్యవసర పరిస్థితుల మంత్రిత్వ శాఖ తెలిపింది. తొలుత ఏడుగురు మరణించారని, తొమ్మిది మంది మిస్సింగ్గా ప్రకటించింది. అనంతరం వారు కూడా చనిపోయినట్లు పేర్కొంది. కాగా, తీవ్రంగా గాయపడిన ఒక వ్యక్తిని ఆసుపత్రికి తీసుకెళ్లినట్లు స్థానిక అధికారులు తెలిపారు.
ఉత్పత్తి ప్రక్రియలో వైఫల్యం కారణంగా గన్ పౌడర్ ఫ్యాక్టరీలో పేలుడు సంభవించిందని ఆ దేశ అత్యవసర పరిస్థితుల మంత్రిత్వ శాఖ వివరించింది. మంటలను అదుపు చేసేందుకు 170 మంది ఎమర్జెన్సీ సిబ్బంది, 50 వాహనాలు పాల్గొన్నాయని వెల్లడించింది.