Visit:
పీర్జాదిగూడ, నవంబర్‌ 29: బోడుప్పల్‌లో అనుమానాస్పదంగా వ్యక్తి మృతి చెందిన ఘటనలో మృతుడి భార్య, కొడుకుతోపాటు మరో వ్యక్తిని రిమాండ్‌కు తరలించిన సంఘటన మేడిపల్లి పోలీస్‌ స్టేషన్‌ పరిధిలో చోటు చేసుకుంది. పోలీసులు తెలిపిన వివరాల ప్రకారం…. బోడుప్పల్‌ దేవేందర్‌ నగర్‌ కాలనీలో నివాసం ఉంటున్న బండారి అంజయ్య(57) స్థానికంగా ఓ ప్రైవేటు పాఠశాలలో డ్రైవర్‌గా పనిచేస్తున్నాడు. మద్యానికి బానిసైన అంజయ్య రోజూ తాగొచ్చి భార్యను కొట్టడంతోపాటు పిల్లలతో గొడవపడేవాడు. దీంతో విసుగు చెందిన భార్య బుగ్గమ్మ(50), కుమారుడు రాజు(26)లు అంజయ్యను కలిసి హతమార్చాలని నిర్ణయించుకున్నారు.
గురువారం రాత్రి సమయంలో డ్యూటీకి వెళ్లి వచ్చిన అంజయ్య రోజూ మాదిరిగా భార్య పిల్లలతో గొడవకు దిగాడు. రాత్రి పడుకున్నది చూసి ఇదే అదనుగా భావించి పథకం ప్రకారం వెంటనే ఇంట్లో ఉన్న తన మేనల్లుడు శ్యామల శేఖర్‌(32) సహాయంతో మృతుడి భార్య, కొడుకులు కలిసి నిద్రలో ఉన్న అంజయ్య మెడకు టవల్‌తో బిగించి హత్య చేశారు. అనంతరం ఉదయం భార్య, కొడుకు మేడిపల్లి పోలీసులకు ఫిర్యాదు చేశారు. అనుమానాస్పదంగా మృతి చెందినట్లు కేసు నమోదు చేసుకున్న పోలీసులు దర్యాప్తులో ముగ్గురూ కలిసి హత్య చేసినట్లు ఒప్పుకున్నారు. దీంతో శనివారం మృతికి కారణమైన నిందితులను రిమాండ్‌కు తరలించినట్లు తెలిపారు.
