Visit:
సిటీబ్యూరో, మార్చి 11 (నమస్తే తెలంగాణ): ఒక్క దెబ్బకు రెండు పిట్టలు! నిన్నటిదాకా గ్రేటర్‌ కాంగ్రెస్‌ నేతల గురి ఇట్లనే ఉండె. ఎమ్మెల్సీ టు క్యాబినెట్‌ దిశగా.. పైకి ఎమ్మెల్సీ ప్రయత్నాలైనా.. ఆ కొమ్మ పట్టుకొని మంత్రివర్గం దాకా ఎక్కాలని తెగ పోరాడారు. ఎవరిస్థాయిలో వాళ్లు అన్ని అస్ర్తాలూ సంధించారు. అధిష్ఠానాన్ని ప్రసన్నం చేసుకునేందుకు అందివచ్చిన దారులన్నింటినీ వినియోగించారు. కొందరు బహిరంగ వేదికలపై ‘ఎమ్మెల్సీ టు క్యాబినెట్‌’ ఆకాంక్షను తమకు తోచిన కోణంలో వ్యక్తం చేశారు. కానీ వారి ఆశలు గల్లంతయ్యాయి. పార్టీ అధిష్ఠానం రెండ్రోజుల కిందట ఇచ్చిన ఎమ్మెల్సీల జాబితాలో అసలు గ్రేటర్‌కు స్థానమే దక్కకపోవడంతో ‘అయినా… అనుకున్నవన్నీ జరుగుతయా?’ అని నిట్టూరుస్తున్నారు. మరి.. ఇంత జరిగినా ఎవరూ గళం మాత్రం విప్పడం లేదు. కారణం… ‘నాకు దక్కకున్నా సరే.. గ్రేటర్‌లోని ఇతర ఆశావహులకైతే దక్కలేదు చాలు…’ అనుకుంటున్నారు. హమ్మయ్య… ఇప్పటికైతే మంత్రివర్గంలో గ్రేటర్‌ బెర్త్‌ ఖాళీనే! మరో అవకాశం రాకపోదా!! అని తమకు తాము సర్ది చెప్పుకుంటున్నారు.
కాంగ్రెస్‌ వచ్చింది.. గ్రేటర్‌ ప్రాతినిథ్యం పోయింది..!
ఎలాగైనా ఎమ్మెల్సీ దక్కించుకుని మంత్రివర్గంలో బెర్త్‌ ఖరారు చేసుకోవాలని ఆశపడిన గ్రేటర్‌ ఆశావహులకు నిరాశే మిగిలింది. ఎమ్మెల్యేల కోటాలో ఐదు ఎమ్మెల్సీ స్థానాలకు నోటిఫికేషన్‌ వచ్చింది మొదలు.. గ్రేటర్‌లోని పలువురు నేతలు జాబితాలో చోటు దక్కించుకునేందుకు చేయని ప్రయత్నమంటూ లేదు. ముఖ్యంగా రాష్ట్ర మంత్రివర్గంలో ఇప్పటిదాకా గ్రేటర్‌ ప్రాతినిథ్యం లేకుండా పోయింది. 2023 అసెంబ్లీ ఎన్నికల్లో గ్రేటర్‌ హైదరాబాద్‌ పరిధిలో ఆ పార్టీకి ఒక్క స్థానం కూడా దక్కలేదు. ఆపై కంటోన్మెంట్‌కు వచ్చిన ఉప ఎన్నికలో శ్రీగణేశ్‌ను విజయం వరించింది. కానీ ఆయన అప్పటికప్పుడు బీజేపీ నుంచి వచ్చి టికెట్‌ దక్కించుకున్న ప్యారాచూట్‌ నేతనే. దీంతో మంత్రివర్గంలో గ్రేటర్‌ ప్రాతినిథ్యం మార్గం సుగమం కానట్లేనని పార్టీ నేతలే కుండబద్దలు కొడుతున్నారు. అయితే ఉమ్మడి ఆంధ్రప్రదేశ్‌ మొదలు గత పదేండ్ల బీఆర్‌ఎస్‌ హయాంలోనూ రాష్ట్ర మంత్రివర్గంలో గ్రేటర్‌ ప్రాతినిథ్యానికి అత్యంత ప్రాధాన్యం ఉంది. కేసీఆర్‌ ప్రభుత్వంలోని మంత్రివర్గంలో తొలి దఫా ఇద్దరు… రెండో దఫాలో ఏకంగా ముగ్గురికి ప్రాతినిథ్యం కల్పించారు. అలాంటిది కాంగ్రెస్‌ ప్రభుత్వం ఏర్పడిన తర్వాత క్యాబినెట్‌లో గ్రేటర్‌ ప్రాతినిథ్యమే లేకుండా పోవడాన్ని పార్టీవర్గాలే పెద్ద లోటుగా భావిస్తున్నాయి.
ఒక్కొక్కరిది ఒక్కో వ్యథ!
గత అసెంబ్లీ ఎన్నికల్లో గ్రేటర్‌ పరిధిలో కాంగ్రెస్‌ పార్టీకి ప్రాతినిథ్యం దక్కకపోవడంతో మంత్రివర్గంలోనూ ప్రాతినిథ్యం లేకుండా పోయింది. ఈ క్రమంలో ప్రజాక్షేత్రంలో విజయం వెక్కిరించినా.. కనీసం అధిష్ఠానం కనికరిస్తే వయా ఎమ్మెల్సీ మంత్రివర్గంలో చోటు దక్కించుకుని బుగ్గకారులో తిరగాలని పలువురు నేతలు తెగ కలలు కన్నారు. ఇందులో భాగంగా ఇటీవల వచ్చిన ఐదు ఎమ్మెల్సీ స్థానాల నోటిఫికేషన్‌తో వాళ్ల కలలకు రెక్కలొచ్చినట్లయ్యాయి. అందుకే అనేక రకాలుగా అధిష్ఠానాన్ని ప్రసన్నం చేసుకునేందుకు తీవ్రంగా ప్రయత్నించారు.
ఎల్బీనగర్‌ నుంచి పోటీ చేసి ఓడిపోయిన టీపీసీసీ ప్రచార కమిటీ చైర్మన్‌ మధుయాష్కీ ఈ జాబితాలో ముందు వరుసలోనే ఉన్నారు. ఇక్కడి ‘ముఖ్య’నేతతో అంతగా సత్సంబంధాలు లేకున్నా హస్తిన నుంచి నరుక్కు వచ్చే అనుభవం, సామర్థ్యం ఆయనకుంది. ఈ క్రమంలో ఎల్బీనగర్‌ గ్రేటర్‌ పరిధిలోకి వస్తున్నందున ఎమ్మెల్సీగా ‘ఒక్క ఛాన్సు’ ఇస్తే ఇట్టే మంత్రివర్గంలో బెర్త్‌ ఖరారు చేసుకోవచ్చని ఆశించారు. కానీ ఏకంగా రాహుల్‌ గాంధీతో ప్రత్యేకంగా భేటీ అయ్యే అవకాశం వచ్చినప్పటికీ జాబితాలో మాత్రం అదృష్టం వరించలేదు.
మాజీ ఎంపీ, పార్టీ సీనియర్‌ నేత అంజన్‌కుమార్‌ యాదవ్‌.. మనసులోని కోరికను ఎప్పుడూ దాచుకున్న దాఖలాలు లేవు. తనయుడికి చిన్న వయసులోనే రాజ్యసభ భాగ్యం కలిగినప్పటికీ… తనలోని మంత్రివర్గ కోరిక మాత్రం కుదురుగా ఉండనీయడం లేదు. అందుకే తనయుడు అనిల్‌కుమార్‌కు ఎంపీ అవకాశం ఇచ్చినా సరే! తన కోటా తనదేనంటున్నారు. ఈ నేపథ్యంలో ఎమ్మెల్సీ స్థానాలకు నోటిఫికేషన్‌ రాకముందే బహిరంగంగానే తన మనసులోని మాటను అనేకసార్లు వెల్లడించడమే కాకుండా గతంలో తనకొచ్చిన అవకాశాలు ఎలా వచ్చాయి… గడపదాకా వచ్చిన అవకాశాలను ఎవరు కొల్లగొట్టారనేది కూడా ఏకరువు పెట్టారు. ఒక దశలో ఒక సామాజిక వర్గాన్ని సైతం లక్ష్యంగా ఎంచుకున్నారు. ఎందుకంటే ఎమ్మెల్సీ అవకాశాల్లో వాళ్లేమైనా మోకాలడ్డుతారేమోనని పరోక్షంగా హెచ్చరించారు. కానీ అధిష్ఠానం మనసులో సమీకరణాలన్నీ వేరేవిధంగా ఉండటంతో అంజన్‌కుమార్‌ పాచిక పారలేదు.
మైనార్టీ కోటాలో తమకు అవకాశం దక్కకపోతుందా.. అని ఎదురుచూసిన గ్రేటర్‌లోని ఇద్దరు కీలక మైనార్టీ నేతలకూ ఈసారి ఆశాభంగమే కలిగింది. నాంపల్లి నియోజకవర్గం నుంచి పోటీ చేసి ఓటమి పాలైన ఫిరోజ్‌ఖాన్‌కు ఎమ్మెల్సీ టు క్యాబినెట్‌ ఆశలు ఎంత ఉన్నాయో… మజ్లిస్‌ రూపంలో ఆ ఆశలకు గండిపడటం ఖాయమనే స్పష్టత కూడా ఉందని ఆ పార్టీకి చెందిన కొందరు నేతలు చెబుతారు. అందుకే అడగనిదే అమ్మయినా పెట్టదన్నట్లు! అడిగితే పోయేదేముంది అనే ప్రయత్నాలేగానీ వంద శాతం సక్సెస్‌ రేటు ఉండదనేది కూడా ఆయనకు తెలుసని సన్నిహితులే అంటుంటారు.
మౌనంగా బంతి విసరడంలో అజారుద్దీన్‌ సిద్ధహస్తుడే అనేది ఆయనను ఎరిగినవారు చెప్పేది. గత అసెంబ్లీ ఎన్నికల్లో ఏకంగా పీజేఆర్‌ తనయుడిని బయటికి పంపి మరీ జూబ్లీహిల్స్‌ టికెట్‌ దక్కించుకున్న ఈ మాజీ క్రికెటర్‌కు అదేరీతిన సమీకరణాలు కుదిరి ఎమ్మెల్సీ టు క్యాబినెట్‌ కలలు సాకారం కాకపోతాయా! అనే ఆశ కూడా ఉందనేది బహిరంగ రహస్యం. పైగా ‘ముఖ్య’నేత మద్దతు పుష్కలంగా ఉండటంతో అధిష్ఠానం జాబితాలో మైనార్టీ కోటాలో సదరు ‘ముఖ్య’నేత పావులు కదిపి తనకు బుగ్గకారు ఎక్కించకపోతారా!! అనే చిన్ని ఆశ కూడా ఉందని పార్టీలోని ఆయన సన్నిహితులు ఆశగా విశ్లేషిస్తారు.
ఇక… ఖైరతాబాద్‌ ఎమ్మెల్యే దానం నాగేందర్‌ గురించి ఎంత మాట్లాడకుంటే అంత మంచిదని ఆయన అనుచరులే పెదవి విరుస్తున్నారట! కాంగ్రెస్‌ అధికారంలోకి వచ్చిన తర్వాత కండువా మార్చితే చాలు! అయితే ఎంపీ, కాకపోతే మంత్రి అన్న బంపర్‌ ఆఫర్‌ తలుపు తట్టడంతో రాత్రికి రాత్రే కారు దిగి హస్తం ఒడిలో ఒదిగిపోయారు. పార్లమెంటు ఎన్నికల ప్రచారంలో ‘ముఖ్య’నేత పిలిచి మరీ పక్కనే తిప్పుకోవడంతో తన దశ మారిందనుకున్నారు. కానీ ఏదో ఒక సినిమాలో అన్నట్లు… దురదృష్టం బెడ్‌రూంలో దుప్పటి తన్నుకుని పడుకుంటే ఏం చేస్తాం?! అన్నట్లు సికింద్రాబాద్‌ లోక్‌సభ స్థానంలో ఓటమి వెక్కిరించడమే కాకుండా క్యాబినెట్‌ కలలు కరిగిపోయాయి. చివరకు నియోజకవర్గంలో అధికారులు సైతం తన మాట వినకపోవడంతో ప్రతిసారీ ‘సీఎంతో మాట్లాడతా’ అని సర్దుకుపోవాల్సిన పరిస్థితి ఏర్పడింది.
