Visit:
బాలానగర్‌, నవంబర్‌ 30: కూకట్‌పల్లి నల్లచెరువు శుద్ధి కోసం ఎస్టీపీ నిర్మాణ పనులను చేపట్టాలని కూకట్‌పల్లి ఎమ్మెల్యే మాధవరం కృష్ణారావు ప్రభుత్వాన్ని డిమాండ్‌ చేశారు. ఆదివారం కూకట్‌పల్లి డివిజన్‌ పరిధిలోని నల్ల చెరువును స్థానికులతో కలిసి ఆయన పరిశీలించారు. ఆయన మాట్లాడుతూ.. నల్ల చెరువులో రైతులకు చెందిన పట్టా భూములు ఉన్నందున వారికి నష్టపరిహారం ఇప్పించేందుకు తనవంతు కృషిచేస్తానని తెలిపారు. చెరువుకు సంబంధించిన శిఖం (ప్రభుత్వ) భూమి కేవలం 7.33 ఎకరాలు మాత్రమే ఉందని మిగతా భూమి అంతా రైతులకు చెందిన పట్టాభూమి అని తెలిపారు. బీఆర్‌ఎస్‌ తరపున రైతులకు అండగా నిలుస్తామని స్పష్టం చేశారు. కొంతమంది సోషల్‌ మీడియాలో నల్ల చెరువు స్థలం కబ్జా అయ్యిందని తప్పుడు ప్రచారం చేయడం తగదన్నారు. నల్ల చెరువు స్థలం కబ్జాకు గురికాలేదని ఎమ్మెల్యే స్పష్టం చేశారు. అభివృద్ధి అనంతరం నల్ల చెరువు పేరు మార్చరాదని నల్ల చెరువుగానే పరిగణించాలని సూచించారు.
కూకట్‌పల్లిలో 9 చెరువుల అభివృద్ధి..
కూకట్‌పల్లి నియోజకవర్గ పరిధిలో 9 చెరువులున్నాయని వాటిలో బోయిన్‌ చెరువు, మైసమ్మ చెరువు, కాముని చెరువు, ముళ్లకత్వ చెరువులను బీఆర్‌ఎస్‌ హయాంలోనే అభివృద్ధి చేసినట్లు తెలిపారు. కూకట్‌పల్లి ప్రాంతంలో లక్ష జనాభా ఉందని ఇక్కడి ప్రజలకు వాకింగ్‌ చేయడానికి సరైన స్థలం లేదని తెలిపారు. నల్ల చెరువు అభివృద్ధి పనులలో భాగంగా చెరువు చుట్టూ వాకింగ్‌ ట్రాక్‌, గ్రీనరీ ఏర్పాటు చేయడం హర్షణీయమని అన్నారు. నల్ల చెరువు అభివృద్ధికి గతంలోనే శ్రీకారం చుట్టినా ఫలితం లభించలేదని పేర్కొన్నారు. నల్ల చెరువు పట్టాదారులు టీడీఆర్‌కు అంగీకరించారని పేర్కొన్నారు. 8 ఎకరాల 33 గుంటల విస్తీర్ణంలో ఉన్న ఖాజా కుంటను అభివృద్ధి చేస్తామని పేర్కొన్నారు.
గతంలో కోట్ల నిధులు కేటాయించి ఐడీఎల్‌ చెరువును అభివృద్ధి చేస్తే మెయింటెనెన్స్‌ చేయడంలో జీహెచ్‌ఎంసీ పూర్తిగా విఫలం అయిందన్నారు. కూకట్‌పల్లి దినదినాభివృద్ధి చెందుతున్న తరుణంలో భవిష్యత్‌లో విద్యుత్‌ సమస్యలు తలెత్తకుండా పత్యేక సబ్‌ స్టేషన్‌ ఏర్పాటు చేయాలని ప్రభుత్వాన్ని కోరామన్నారు. నియోజకవర్గం పరిధిలో ఎస్టీపీ నిర్మాణం కోసం రూ. 325 కోట్లు కేటాయించి ముల్లకత్వ చెరువు, మైసమ్మ చెరువు, ఫతేనగర్‌లో ఎస్టీపీల నిర్మాణం చేపట్టి పూర్తిచేసినట్లు వెల్లడించారు. నల్ల చెరువులో కూడా ఎస్టీపీ నిర్మాణం కోసం రూ.50 కోట్లు కేటాంయించినట్లు ఆయా పనులను చేపట్టాలని ఆయన పేర్కొన్నారు.
క్రికెట్‌ స్టేడియాన్ని నిర్మించాలి..
కూకట్‌పల్లి హుడా ట్రక్‌ పార్కింగ్‌ స్థలంలో క్రికెట్‌ స్టేడియాన్ని నిర్మించాలని ఎమ్మెల్యే మాధవరం ప్రభుత్వానికి విజ్ఞప్తి చేశారు. కూకట్‌పల్లిలో ప్రైం లొకేషన్‌లో ఉన్న 29 ఎకరాల స్థలాన్ని 1983లో అప్పటి ముఖ్యమంత్రి ఎన్‌టీఆర్‌ ట్రక్‌ పార్క్‌కు కేటాయించారని గుర్తుచేశారు. ఇక్కడి ట్రక్‌ పార్కింగ్‌ను 5 ఏండ్ల క్రితం బీఆర్‌ఎస్‌ ప్రభుత్వం పటాన్‌ చెరుకు తరలించిందని పేర్కొన్నారు. ట్రక్‌ పార్క్‌ స్థలం సమీపంలోకి ప్రపంచ దిగ్గజ మాల్‌ త్వరలో ఆవిష్కృతం కాబోతుందని తెలిపారు.
ఇలాంటి స్థలంలో క్రికెట్‌ స్టేడియం నిర్మాణం చేపడితే అందరికీ అనువుగా ఉంటుందని తెలిపారు. ఈ విషయాన్ని అసెంబ్లీలో ముఖ్యమంత్రి దృష్టికి తీసుకుపోయినట్లు పేర్కొన్నారు. ప్రస్తుత ప్రభుత్వం ట్రక్‌ పార్క్‌ స్థలాన్ని వేలం వేసి విక్రయించబోతున్నట్లు ప్రకటనలు వచ్చాయని.. దీనిని పూర్తిగా విభేదిస్తున్నట్లు పేర్కొన్నారు. రైతుల వద్ద తీసుకున్న భూమిని ప్రజల అవసరాలకు అనుగుణంగా వినియోగించాలని సూచించారు. కూకట్‌పల్లి నియోజకవర్గంలో ప్రజావసరాలకు స్థలం లేని కారణంగా సంబంధిత భూమిని విక్రయించే ప్రయత్నాలు మానుకొని ప్రజా అవసరాలకు దానిని వినియోగిచచాలని సూచించారు.
