Hyderabad | తాగునీరు వృథా చేస్తే ఊరుకోం.. జూబ్లీహిల్స్‌ పబ్‌కు రూ.20 వేల జరిమానా!

Hyderabad | హైదరాబాద్‌లో తాగునీటి దుర్వినియోగంపై జలమండలి చర్యలు చేపట్టింది. జూబ్లీహిల్స్‌లోని ఫోర్ ఫాదర్స్‌ పబ్‌కు రూ.20 వేల జరిమానా విధించి, తాగునీటి కనెక్షన్‌తో పాటు కమర్షియల్‌ వాటర్‌ ట్యాంకర్ల సరఫరాను నిలిపివేసింది.

Hyderabad | తాగునీటిని దుర్వినియోగం చేస్తే ఎంతటి వారిపైనైనా చర్యలు తప్పవని హైదరాబాద్‌ జలమండలి స్పష్టం చేసింది. నీటి వృథాపై అందిన ఫిర్యాదుతో జూబ్లీహిల్స్‌లోని ఫోర్ ఫాదర్స్‌ పబ్‌పై అధికారులు చర్యలు తీసుకున్నారు. నిబంధనల ఉల్లంఘనకు సంబంధించి రూ.20 వేల జరిమానా విధించడంతో పాటు తాగునీటి కనెక్షన్‌ను తొలగించారు. కమర్షియల్‌ వాటర్‌ ట్యాంకర్ల ద్వారా అందించే నీటి సరఫరాను కూడా నిలిపివేశారు.

జూబ్లీహిల్స్‌ సర్కిల్‌ పరిధిలోని రోడ్‌ నంబర్‌ 45, ప్లాట్‌ నంబర్‌ 872లో ఉన్న ఫోర్ ఫాదర్స్‌ పబ్‌లో నీటి దుర్వినియోగం జరుగుతున్నట్లు జలమండలికి ఫిర్యాదు అందింది. దీంతో అధికారులు క్షేత్రస్థాయిలో తనిఖీలు నిర్వహించారు. నీటి దుర్వినియోగానికి పాల్పడినట్లు గుర్తించడంతో పబ్‌ యాజమాన్యంపై చర్యలు తీసుకున్నారు. జరిమానాతో పాటు తాగునీటి కనెక్షన్‌ను తొలగించి, కమర్షియల్‌ వాటర్‌ ట్యాంకర్ల సరఫరాను నిలిపివేశారు.

వేసవిలో తాగునీటి అవసరాలు పెరిగే అవకాశం ఉండటంతో ప్రతి నీటి చుక్కనూ పొదుపుగా వినియోగించాలని జలమండలి ప్రజలకు సూచించింది. హోటళ్లు, రెస్టారెంట్లు, పబ్‌లు, ఇతర వాణిజ్య సంస్థలు తాగునీటిని వృథా చేయకుండా బాధ్యతగా వ్యవహరించాలని కోరింది. నీటి దుర్వినియోగాన్ని ఉపేక్షించబోమని, నిబంధనలు ఉల్లంఘిస్తే జరిమానాలతో పాటు కనెక్షన్ల తొలగింపు వంటి చర్యలు తీసుకుంటామని హెచ్చరించింది. నగరంలో ఎక్కడైనా తాగునీటి వృథా లేదా దుర్వినియోగం కనిపిస్తే ప్రజలు జలమండలికి వాట్సాప్‌: 99499 30003, కస్టమర్‌ కేర్‌: 155313 నంబర్ల ద్వారా సమాచారం అందించాలని అధికారులు కోరారు.

ఫిర్యాదుతో పాటు ఘటనకు సంబంధించిన ఫొటోలు, వీడియోలు, వ్యక్తులు లేదా సంస్థల వివరాలు, ప్రాంతం, పూర్తి చిరునామాను పంపించాలని సూచించారు. అందిన ఫిర్యాదులపై క్షేత్రస్థాయిలో విచారణ జరిపి, ఉల్లంఘనలు నిర్ధారణ అయితే నిబంధనల ప్రకారం చర్యలు తీసుకుంటామని తెలిపారు. సమాచారం ఇచ్చిన వారి వివరాలను గోప్యంగా ఉంచుతామని జలమండలి హామీ ఇచ్చింది.