బియ్యం ధరలతో బ్యానర్లు తప్పనిసరి

బియ్యం ధరలను నియంత్రించడం, వినియోగదారులకు నాణ్యమైన బియ్యాన్ని సరసమైన ధరలకు అందుబాటులో ఉంచడం, బియ్య వ్యాపారంలో పారదర్శకతను పెంపొందించే లక్ష్యం తో కీలక నిర్ణయం తీసుకున్నట్లు హైదరాబాద్‌ జిల్లా ముఖ్య రేషనింగ్‌ అధికారి పేర్కొన్నారు.

సిటీబ్యూరో: బియ్యం ధరలను నియంత్రించడం, వినియోగదారులకు నాణ్యమైన బియ్యాన్ని సరసమైన ధరలకు అందుబాటులో ఉంచడం, బియ్య వ్యాపారంలో పారదర్శకతను పెంపొందించే లక్ష్యం తో కీలక నిర్ణయం తీసుకున్నట్లు హైదరాబాద్‌ జిల్లా ముఖ్య రేషనింగ్‌ అధికారి పేర్కొన్నారు. ఈ మేరకు ఆయన విడుదల చేసిన ప్రకటనలో బియ్యం ధరలను సూచిస్తూ హైదరాబాద్‌ జిల్లాలో ప్రత్యేక బ్యానర్లు ఏర్పాటు చేసినట్లుగా బ్యానర్ల నమూనాను విడుదల చేశారు.

ప్రభుత్వం, పౌరసరఫరాలశాఖ అధికారులు, రైస్‌ మిల్లర్లు, హోల్‌సేల్‌ బియ్యం వ్యాపారులతో నిర్వహించిన చర్చల అనంతరం వివిధ రకాల బియ్యానికి కిలోకు గరిష్ట చిల్లరధరలను నిర్ణయించారు. ఈ నిర్ణయం ప్రకారం 26 కిలోల బ్యాగ్‌ ప్యాక్‌లలో విక్రయించే బియ్యం రకాల వారీగా బీపీటీ/కేఎన్‌ఎమ్‌ రూ.66, ఆర్‌ఎన్‌ఆర్‌/తెలంగాణసోనా రూ.74, హెచ్‌ఎంటీ/జేఎస్‌ఆర్‌ రూ.79 ధరలుగా నిర్ణయించి ప్రత్యేక బ్యానర్‌ను రూపొందించారు.

బియ్యం విక్రయ కేంద్రాల్లో ఈ బ్యానర్లను వినియోగదారులకు స్పష్టంగా కనిపించేలా ప్రదర్శించాలని ఆదేశించారు. అధిక ధరలకు బియ్యం విక్రయించరాదని, హైదరాబాద్‌ జిల్లాలో సీఎస్‌ డిపార్ట్‌మెంట్‌ అధికారులు క్షేత్రస్థాయిలో పర్యవేక్షిస్తారని జిల్లా ముఖ్య రేషనింగ్‌ అధికారి పేర్కొన్నారు.