మెరుస్తూ.. మురిపిస్తూ..

• సొబగులు అద్దుకుంటున్న మహానగరంలోని జంక్షన్లు
• ఫౌంటెన్లు, వర్టికల్‌ గార్డెన్లు, ప్రత్యేక ఆకృతులు ఏర్పాటు చేస్తున్న ప్రభుత్వం

సిటీబ్యూరో, జూలై 5 (నమస్తే తెలంగాణ): మహానగరంలోని జంక్షన్లు కొత్త సొబగులు అద్దుకుంటున్నాయి. ఆధునీకరణలో భాగంగా ప్రభుత్వం ప్రత్యేక ఆకృతులు, వాటర్‌ ఫౌంటెన్లు, వర్టికల్‌ గార్డెన్లను ఏర్పాటు చేయడంతో పచ్చదనంతో కళకళలాడుతూ అతి సుందరంగా మారుతున్నాయి. అంతేకాక ఖైరతాబాద్‌ ఫ్లై ఓవర్‌, ఎన్టీఆర్‌ మార్గ్‌, మోజంజాహి మార్కెట్‌, బంజారాహిల్స్‌ ప్రధాన కూడళ్లతో పాటు పలు ప్రాంతాల్లో ఏర్పాటు చేసిన లైటింగ్‌ నగరవాసులను మురిపిస్తున్నది.

ముస్తాబు ఇలా..

• నగరంలోనే ప్రధానమైన ఖైరతాబాద్‌ జంక్షన్‌ను జీహెచ్‌ఎంసీ పూర్తిస్థాయిలో అభివృద్ధి చేసింది. అక్కడ ఐ లవ్‌ హైదరాబాద్‌ పేరుతో ఏర్పాటు చేసిన గార్డెన్‌, అందులోని అందమైన మొక్కలు వాహనదారులను ప్రత్యేకంగా ఆకర్షిస్తున్నాయి.
• సికింద్రాబాద్‌లోని సంగీత్‌ జంక్షన్‌లో పేరుకు తగ్గట్టుగా ఏర్పాటు చేసిన సంగీత వాయిద్యాల ప్రతిమలు చూపరులను ఆకట్టుకుంటున్నాయి.
• లక్డీకాపూల్‌లో ఏర్పాటు చేసిన కట్టెల వంతెనను పోలిన థీమ్‌ ఆ జంక్షన్‌కు కొత్త కళ తెచ్చింది.
• కుత్బుల్లాపూర్‌ జంక్షన్‌లో ఏర్పాటు చేసిన ఇరానీ చాయ్‌ థీమ్‌ నగర వాసులను కట్టిపడేస్తోంది.
• సినిమా షూటింగ్‌లను ప్రతిబింబించేలా ఎల్బీనగర్‌ చింతల్‌కుంట జంక్షన్‌ వద్ద కెమెరామెన్‌ థీమ్‌తో ఏర్పాటు చేసిన ప్రత్యేక ఫౌంటెయిన్‌ ప్రతిఒక్కరినీ ఆకట్టుకుంటున్నది.
• ఉప్పల్‌, మల్లాపూర్‌, ఫోరమ్‌ మాల్‌, ఐకేఈఏ, ఆరాంఘర్‌, జూబ్లీహిల్స్‌ చెక్‌పోస్ట్‌లోని కూడళ్లు ప్రత్యేక థీమ్‌లతో బహు సుందరంగా మారాయి.

క్లాక్‌టవర్లకు మెరుగులు..

జంటనగరాల్లో చారిత్రక నేపథ్యం కలిగిన క్లాక్‌ టవర్లను జీహెచ్‌ఎంసీ తీర్చిదిద్దింది. నిర్వహణకు నోచుకోక కళావిహీనంగా మారిన సికింద్రాబాద్‌, సెయింట్‌ జార్జ్‌, ఫతే మైదాన్‌లోని చరిత్రకు గుర్తులైన క్లాక్‌ టవర్లు ప్రస్తుతం సరికొత్త అందాలు అద్దుకొని నగరవాసులను మైమరపింపజేస్తున్నాయి.